Қазақстан Республикасы Конституциясының 20 жылдық мерекесіне орай, облыстық білім, жастар саясаты және тілдерді дамыту басқармасының ұйымдастыруымен өткен «Мемлекеттік тіл және БАҚ» атты облыстық байқау бұқаралық ақпарат құралдары арасында ана тілімізді кеңінен насихаттап, өткір де өзекті мәселелерді көтеріп, халық пен билік арасында алтын көпірге айналған журналистерді ынталандыру мақсатын көздейді. Осымен алтыншы жыл өтіп отырған байқауда «Айғақ» телеарнасының жас журналисі Ботагөз Мәдібек топ жарып, марапат төрінен көрінді. Мемлекеттік тілде мақала жариялап қана қоймай, оның мәні мен мағынасын аша жазған тілшілер қауымының еңбегін арнайы әділқазылар алқасы сарапқа салған. Жалпы саны байқауға 15 телеарна материалдары мен 45 мақала келіп түскен. Байқау барысында үздік жұмыс жасаған сайт жетекшілері мен телеарна тілшілері газеттегі мақала авторлары, ұстаздар да марапатқа ие болды.
ОҚО Білім, жастар саясаты және тілдерді дамыту басқармасының ұйымдастыруымен өткен бұл байқау алда да өз жалғасын таба бермек. Ал, қаламы қарымды, ойы ұшқыр, қызығы мен қиыны қатар жүретін мамандық иелерінің ана тілімізді өркендетудегі еңбектеріне табыс тілейміз.
Еңлік ЗАМАНХАН
