2016 жылдың 11-ші шілдесінен бастап «Қазақстан Ипотекалық компаниясы» акционерлік қоғамы арқылы Асар шағын ауданында соғылған үйлерден тапсырылатын 900 пәтерге өтініштерді қабылдау басталды. Ал баспаналы болудан үміткерлер үшін биыл қажетті құжаттарды тапсыру электронды нұсқада жүргізіліп отыр. Осы орайда өтініштер мен құжаттардың электронды тапсырылуы бойынша тиісті кеңестерді халыққа қызмет көрсету орталықтарынан алуға болады. Бұл туралы сала мамандары арнайы баспасөз жиынында мәлімдеді. Қалалық тұрғын үй қатынастары бөлім басшысының орынбасары Г.Әшірбаеваның айтуынша, 2016 жылдың 4 тоқсанында «Асар» шағын ауданынан берілетін 900 пәтерлі 15 тұрғын үйге кезекке тұру мақсатында «E-gov» порталы арқылы 11 шілдеден бүгінгі күнге дейін 1746 азаматтан өтінім келіп түскен. Оның ішінде мемлекеттік қызметкерлер саны 1473 болса, 273-і көпбалалы, толық емес отбасылар және мүгедек бала асыраушы отбасылар. 
Баспасөз мәслихатына қатысқан «Халыққа қызмет көрсету орталығы» департаменті директорының орынбасары Е.Әлсейтов әрбір қатысушы өтініштер мен құжаттарды тапсыру үшін Электронды Цифрлық Қолтаңба (ЭЦҚ) кілті арқылы электронды порталға тіркеліп жатқандығын айтты. Және халыққа қызмет көрсету орталығының мамандары тарапынан электронды тапсыру бойынша кеңестер беріліп жатқанын жеткізді. Бүгінде ХҚКО-ғы «E-gov» пункттерінде электронды порталға тіркелу мен тапсыру бойынша 5 мыңға жуық азаматқа кеңестер беріліп, оқу оқытқан.
Брифингті қорытындылаған облыс әкімі аппараты ақпараттандыру және мемлекеттік қызмет көрсету мониторингі бөлімінің басшысы Е.Өтебаев жалпы бүгінде халыққа қолайлы жағдай жасап, кезекте тұрмай ақ, үйде отырып электронды портал арқылы қажетті құжаттары мен өтінімдерін тастау арқылы тиісті деңгейде жұмыстар атқарылып жатқанын айтты. Сондай-ақ, ол «E-gov» порталы тәулік бойы жұмыс істеп, өтініштерді қабылдайтынын хабарлады.
Абай Омар
