Оңтүстік полицейлері кәсіби мерекелерін атап өтті

Ел тыныштығы мен қоғам қауыпсіздігін күзетіп, қылмыспен күрескен тәртіп сақшыларының бүгін төл мерекелері. Атаулы датаға орай, ОҚО -ның әкімі Бейбіт Атамқұлов оңтүстік полицейлерін мерекемен құттықтап, спартакиада жарыстарын тамашалады.  Бұл күні ішкі істер саласының қызметкерлері  спорттық сайыстарда бағын сынап, ал мінсіз қызмет атқарғандар марапат төрінен көрінді.Мерекелік шараны жоғарғы деңгейде ұйымдастырған тәртіп сақшылары жиынға  келген қадірменді қонақтарды үлкен құрметпен қарсы алды. Яғни, таңғы сағат 9:00-де «Динамо» стадионының кіре берісінен бастап қаз-қатар сап түзеген инспекторлар отряды қысқаша  жаттығуларынан үзінді көрсетіп, ал жас динамошылар бір мезетте бейбітшіліктің нышаны ақ көгершінді аспанға ұшырды. Бұл өз кезегінде мерекенің сәнін ашып, келген қонақтарға ерекше әсер сыйлады. Мұнан кейін әнұранымыз шырқалып, өңіріміздің әр аймағынан жиналған тәртіп сақшылары еліне адал қызмет атқара жүріп қайтыс болған 22 бірдей қызметкерді бір минуттық үнсіздікпен еске алды.Полиция қызметкерінің жұмысы аса зор жауапкершілікті талап  етеді. Қиындығы мен қызығы қатар жүретін бұл салада еңбек етушілерге қойылатын талап таудай, міндет те жоғары. Сол себепті ішкі істер саласында қалтқысыз қызмет етіп жүрген азаматтар кейде өз өмірін бәйгеге тігіп жатады. Отанына, еліне деген риясыз, адал еңбек қашанда құрметке лайықты.  Бұл күні қызмет бабында жоғарғы көрсеткіштерге жетіп, қажырлы еңбегімен көзге түскен бірқатар қызметкерге ОҚО ІІД-ның бастығы, генерал-мойор Асқар Оспанов Алғыс хаттар мен кезекші шендері мереке аясында  табыстады. Марапатқа ие болған жанның бірі Сарыағаш аудандық ІІБ-нің бастығы Орынбасар Қабыштаев. Тәулікпен санаспай қылмыскерлерді құрықтауда түрлі оқиғаларға тап болып, анықтау, қалыптасу,  әділдігін шығару сындарлы жолдардан өтіп, полиция қызметінен құрметті зейнетке шыққан Жеңісбай Сұлтанов бүгін қазақ полицияларына өздерінің кәсіби шеберлігімен,  жоғарғы даярлықтатын көрсетуде аянып  қалмауларын айтып, құттықтауын жеткізді.Мерекелік шараның ресми бөлігінен кейін облыс әкімі жарыстың бірінші доп тебілуі  рәсіміне бастауға рұқсат берді. Динамоның ауласында аудан, қалалардан келген  полицейлер тартысты ойын көрсетіп, спартакидада үздік өнер  көрсеткендер мерекелік медаль және бағалы сыйлықтармен марапатталды.Ұлдархан Уәлиханқызы