Бүгін Шымкент қаласы әкімі аппаратының үлкен мәжіліс залында қала әкімі Ғабидолла Әбірахымовтың қатысуымен Шымкент қалалық Қазақстан халқы Ассамблеясы кеңесінің алғашқы отырысы өтті. 
Жиынға қала басшылығы, қалалық мәслихаттың хатшысы мен депутаттары, басқарма басшылары, аудан әкімдері, құқық қорғау органдарының өкілдері, «Нұр Отан» партиясы қалалық филиалының және қалалық этномәдени бірлсетіктерінің жетекшілері және ЖОО-ның басшыларымен белсенді жастар қатысты.
Кеңес отырысында қалалық Ассамблея жанындағы құрылымдардың жетекшілері бекітіліп, жалпы ұлттық бірлік пен қоғамдық келісімді нығайтуда қалалық Ассамблеяның алда атқаратын жұмыс бағыттары айқындалды. Сонымен қатар, Шымкент қалалық Қазақстан халқы Ассамблеясы төрағасының орынбасары, Ассамблея хатшылығының меңгерушісі Мұратәлі Қалмұратов атқарылған жұмыстар мен алдағы міндеттер бойынша хабарлама жасады.
Сондай-ақ, кеңес отырысында Шымкент қалалық корей этномәдени бірлестігінің төрайымы Роза Пактің, қалалық славян этномәдени бірлестігінің төрайымы, оқушылар сарайының директоры Наталья Романованың, «Global cofee және salem cofee» ЖШС-нің директор, жас кәсіпкер Данияр Мамирхановтың хабарламалары тыңдалып, Елбасының биылғы Жолдауы мен бағдарламалық мақалаларын іске асыруда Ассамблея мүшелерінің қосар үлесі талқыланды.
Басқосуда ҚР Президенті, Қазақстан халқы Ассамблеясының Төрағасы Н.Назарбаевтың атынан ел бірлігін нығайту, бейбітшілік пен келісімді сақтауға қосқан елеулі үлесі үшін бірқатар азаматтарды Шымкент қаласының әкімі Ғабидолла Рахматоллаұлы арнайы марапаттады. Атап айтқанда, қалалық ҚХА Қоғамдық келісім кеңесінің төрағасы, қоғам қайраткері Орынбай Рахманбердиев пен әзербайжан этномәдени бірлестігі төрағасының орынбасары Арзу Гурбанова Қазақстан халқы Ассамблеясының «Бірлік» алтын медалімен, белгілі кәсіпкер, меценат Айдар Досболов Қазақстан халқы Ассамблеясының «Жомарт жан» төсбелгісімен, танымал қолөнер шебері Берік Бейісбеков, қала әкімі аппараты «Қоғамдық келісім » КММ бөлім басшысы Әмірхан Құдайберген Қазақстан халқы Ассамблеясының Құрмет Грамотасымен, «Ладушки» кондитерлік дүкендер желісінің бас директоры Светлана Лугина Қазақстан халқы Ассамблеясының Алғыс хатымен марапатталды.
Айта кету керек, Шымкент қаласы әкімі аппаратының Қазақстан халқы Ассамблеясының хатшылығы биылғы жылдың шілде айында құрылып, қала аумағында жалпыұлттық бірлік пен қоғамдық келісім саласындағы мемлекеттік мекемеге көшірілген.
