Бұл күні төтенше жағдайлардың қызметін пысықтау барысында ауданның жеке құрамдағы 100-ден аса қызметкері мен 45 техникасы жұмылдырылды. Әрқайсысының апатты жағдайда атқаратын өзіндік маңызды рөлі бар. Атап айтсақ, ауданның жылжымалы басқару пункті, байланыс құралдары, медициналық жабдықтар, өрт сөндіру бөлімі секілді ұзын саны 14 қызметтің түрі апат бола қалған жағдайға сақадай сай әзір тұр.
Олардың жұмысымен жекелей танысып шыққан мекеме басшылары тіпті төтеннен сұрақ қойып, мамандардың біліктілігін де сынап көрді. Жоспарға сәйкес, таңғы уақытта ауданда «жер сілкіну» дабылы қағылды. Табиғи апат туындаған сәтте ғимараттағы адамдардың сауатты қимылдауы аса маңызды. Сондықтан апатты жағдайдағы қызметкерлердің іс-әрекетін бақылау ең алдымен аудан әкімдігінен басталды. Ережеге сай қимылдаған ғимараттағы азаматтар үрейге бой алдырмастан өз ретімен қауіпсіз жерге көшірілді. Келесі кезекте аудандағы білім ұяларының іс-әрекеті тексерілді. 1500-ге жуық оқушысы бар орта мектептің ұжымы да сауатты қимылдай білді.
Дабыл қағылысымен ғимарат ішіндегілер алдымен қауіпсіз жерге жасырынып, белгі берілген соң алаңға шығарылды. Оқушылармен түсіндіру жұмыстарын жүргізген мамандар балабақшаны да назардан тыс қалдармады. Ереже бойынша әрекет еткен тәрбиешілер бүлдіршіндермен бірге тез арада ғимараттан шығарылды. Апатты жағдайдағы іс-әрекет жөнінде балабақша балғындарының да сауаты көңілге қонымды шықты. Сондай-ақ, өрт сөндіру қызметінің жедел іс-қимыл әрекеті де бақыланды. Тілсіз жаудың туындағаны жайлы хабарламаны алысымен жедел жеткен өрт сөндірушілер жалынды ауыздықтауға кірісті.
Арнайы техниканың көмегімен мамандар ғимарат ішінде қалып қойған азаматтарды құтқаруға жұмылды. Заманауи техниканың қауқары да осы сәтте сыналады. Мәселен, өрт сөндіру көлігіндегі мына саты жаттығу барысында 6-қабаттағы азаматты алып шығуға бірден бір көмегін тигізді. Қауіпсіз аймаққа жеткізілген жандар дер кезінде дәрігерлердің бақылауына алынды. Сарыағаш ауданында жүргізілген практикалық іс-шара алдағы уақытта өзге аудандарда да өткізілетін болады.
Абдумутали Жұмаш
