Сейсенбі күні М. Әуезов атындағы ОҚМУ ғимаратында Қазақстан халқы Ассамблеясының қолдауымен Қазақстан Республикасы Президентінің жанындағы Мемлекеттік басқару академиясының ұйымдастыруымен «Қазақстан өңірлерінде бірлік пен біртектілікті нығайту бойынша этносаяси менеджмент» тақырыбындағы үш күндік өңірлік семинар-тренинг басталды. Жиынға Қызылорда, Жамбыл, Оңтүстік Қазақстан облыстары және Алматы қаласының мемлекеттік органдардың қызметшілері, ҚХА хатшылықтарының жетекшілері мен мамандары, өңірлік «Қоғамдық келісім» мекемелерінің қызметкерлері, этномәдени, діни, жастар ұйымдарының жетекшілері қатысуда. Семинарды ашқан Оңтүстік Қазақстан облысы әкімінің орынбасары Ұласбек Сәдібеков барша қатысушыларға сәттілік тілеп, елімізде жүргізіліп жатқан этносаралық саясаттың маңызына тоқталды. Үш күндік семинар барысында Қазақстан Республикасы Президентінің жанындағы Мемлекеттік басқару академиясының профессорлары, Қазақстан халқы Ассамблеясы Хатшылығы жанындағы ғылыми-сарапшылық топтың мүшелері арнайы дәрістер оқып, «100 нақты қадам» Ұлт жоспарында белгіленген жалпыұлттық бірлік пен бірегейлікті қалыптастыру міндеттерін жүзеге асыру тетіктері талданады. Сонымен қатар, мемлекеттік қызметшілердің этикасы мен имиджі мәселесіне көңіл бөлінеді. Семинар-тренинг жұмысы барысында қатысушыларға арналған облыстық Әдеп-ғұрып және салт-дәстүр орталығында және Оңтүстік Қазақстан облысының тарихи-өлкетану мұражайында экскурсия ұйымдастырылады.
«AMANAT» ПЕН «ӘДІЛЕТ» БІРІКТІ
«AMANAT» партиясы мен «Әділет» партиясы бірікті. Тарихи шешім Астанада өткен «AMANAT» партиясының XXVI съезінде қабылданды. Делегаттар бұл бастаманы бірауыздан қолдап,...
