Бүгін Түркістан қаласында «Денсаулық сандарына жет!» ұранымен «ДЕНСАУЛЫҚ ФЕСТИВАЛІ — 2018» кең ауқымды акциясы өтіп жатыр. Ұйымдастырылған шараның мақсаты еліміздің денсаулық сақтау саласын дамыту аясындағы «Денсаулық» мемлекеттік бағдарламасы және «Денсаулық Фестивалі» Ұлттық бағдарламасын іске асыру.
Сондай-ақ, қоғамның назарын белсенді өмір сүруге аудару, денсаулықтарына жауапкершілікпен қарауды насихаттау. Кең ауқымда өтіп жатқан акция Түркістан облысы бойынша 2018 жылдың 8 қыркүйегінде бір мезетте таңғы сағат 08.00-де «Дені саудың жаны сау» ұранымен таңғы жаттығумен басталды.
Облыс орталығы Түркістан қаласында «Рәміздер» алаңынан таңғы жаттығумен бастау алған шара, сағат 09.00-ден «Есімхан» алаңына дейін жаяу жүру марафонымен жалғасын тапты.
Облыс орталығы, Түркістан қаласындағы орта білім беретін мектептердің қатысуымен «Пайдалы тағамдар» көрмесі ұйымдастырылды. Көрмеге оқушылар өз қолымен дайындалған, өнімдердің пайдалы қасиеттерін дәріптейтін композициялары орналастырылып, тұрғындардың назарына фармкомпаниялар да өз өнімдерін ұсынды. Сонымен қатар, спорт түрлерінен түрлі көріністер мен турнирлер де ұйымдастырылып, көтеріңкі көңіл-күй сыйлайтын түрлі мәдени іс-шаралар өткізілді.
