ҚР Қаржы министрi Бақыт Сұлтанов халыққа есеп беру кездесуiнде бюджеттiң ашықтығы туралы сөз қозғады, деп хабарлайды Baq.kz.
«Азаматтарды бюджет процесіне тарту үшін министрлік бюджеттік құжаттардың азаматтық нұсқасын да жариялайды. Бюджеттік деректерді жариялау бұл тек бірінші қадам екенін атап өту керек. Екінші, анағұрлым күрделі қадам — азаматтарды бюджеттік мәселелерді талқылау процесіне тарту. Қоғаммен байланыс орнату үшін министрлік сайтында бюджет шығыстарының басым бағыттарымен қоса бюджетті жоспарлау және атқару мәселелері талқыланатын форумдар өткізу мүмкіндігі көзделген… 2018 жылдан бастап жергілікті өзін-өзі басқару бюджетінің 4 деңгейі енгізілгенін сіздер білесіздер. Біздің қазынашылық ақпараттық жүйелерде функционалды кеңейту бойынша пысықтау жүргізілді. Бірінші кезеңде 1062 жергілікті өзін-өзі басқару үшін өңірлердің жаңа алты мәнді коды берілді. Сондай-ақ, жергілікті өзін-өзі басқару бюджеттерінің қаражаттарын бақылау шоттары ашылды. Бұл үшін 2017 жылы өзара іс-қимыл жасасатын ведомстволармен бірлесіп өңірлерде топтық форумдар өткізілді. Аудандық маңызы бар қалалар, ауылдар, кенттер мен ауылдық округтер әкім аппараттарының 5075 маманы оқытылды», — дедi Бақыт Сұлтанов.
Сондай-ақ, министрдiң айтуынша, Қазақстан Президентiнiң тапсырмасымен үкімет мемлекеттік-жекешелік әріптестікті дамыту бойынша үлкен жұмыс жүргізіп келеді. 2018 жылғы 15 маусымдағы жағдай бойынша мемлекеттік-жекешелік әріптестіктің 212 шарты тіркелді. Оның ішінде: 610,7 млрд теңге сомаға республикалық жобалар бойынша 4 шарт, 161,1 млрд теңге сомаға жергілікті жобалар бойынша 208 шарт жасалды.
