Сапалы білім — саналы ұрпақ қалыптастырады

Қаламыздағы Саттар Ерубаев атындағы №24  мектеп-лицейінде 1650 оқушы бар. Мұның барлығы жаңа заман талабына сай, яғни «Цифрлы Қазақстан» жүйесі бойынша білім алуда. Сондай-ақ, оқушылардың жазғы демалысын тиімді өткізу үшін де бар жағдайлар қарастырылған. Мәселен, ойын алаңшалары мен қатар түрлі үйірмелер оқушылардың салауатты өмір салтын қалыптастыру үшін қызмет етпек.

Мемлекет басшысының «Қазақстанның үшінші жаңғыруы: жаһандық бәсекеге қабілеттілік» атты халыққа  Жолдауында біз цифрлы технологияны қолдану арқылы құрылатын жаңа индустрияларды өркендетуге тиіспіз. Елде 3D принтинг, онлайн-сауда, мобильді банкинг, цифрлы қызмет көрсету секілді денсаулық сақтау, білім беру ісінде қолданылатын және басқа да перспективалы салаларда дамыту керектігі айтылған. Бүгінде бұл бастама өз деңгейінде қолға алынып жатыр. №24 Саттар Ерубаев атындағы мектеп-лицейінде орнатылған интерактивті құрылғылар осының дәлелі.

«Thunter»- педагог мамандарын жұмысқа қабылдауға көмек береді. Яғни, «Thunter» арқылы білім саласында қызмет еткісі келетін азаматтар өз түйіндемелерін қалдыра алады. Әрине бұл бір жағынан уақытты үнемдеуге және қағаз бастылықтан құтылуға септігін тигізеді. Саттар Ерубаев атындағы №24 мектеп-лицейінде аталған интернет жүйесі өткен жылы орнатылған. Нәтижесінде бүгінге дейін 15 педагог жұмысқа қабылданып балаларға сапалы білім беруде.

Мұнан бөлек оқу ордасындағы оқушылардың бос уақыттарын тиімді пайдалану үшін бар жағдайлар қарастырылыпты. Атап айтқанда шахмат, кітап оқу, қолөнер мұражайы және робототехника құрастыратын бөлмелер қарастырылған. Сонымен қатар мамандардың мәліметіне сүйенсек Қазақстан бойынша жалғыз «Лазерлі интерактивті тақта»  осы білім қабырғасынан орын алған.

Биыл Саттар Ерубаев атындағы №24 мектеп – лицейінің оқушыларына «Астанам жүрегімде» тақырыбындағы сауықтыру орталығы қызмет жасайтын болады. Ендеше бұл білім ошағының балаларға сапалы білім беріп, болашақтың тірегі болатын жастар қалыптастыруда талмай еңбек етуіне тілектеспіз.

Мақсат Тоқсанбай.