БАҚ өкілдеріне ағымдағы жылы атқарылған жұмыстарды баяндаған Созақ ауданының әкімі Мақсат Исаев өз есебін алдымен аймақтың қаржы, экономикалық әлеуетінен бастады. Айтуынша жергілікті бюджетке былтыр 8,5 млрд. теңгеге жуық қаржы түсіп, жоспар 120 пайызға артығымен орындалған. Ал жалпы өңірлік өнім көлемі 224 млрд. 646 млн. теңгені құраса, оның 204 млрд. теңгеден астамы өнеркәсіп саласының еншісінде. Сондай-ақ, ауыл шаруашылығы саласында өнірілген өнім көлемі де ұлғайып, 9 млрд. 31 млн. теңгені құраған. Әсіресе мал басы санын молайтуға қатысты мемлекеттік бағдарламалардың орындалу денгейі де жоғары көрсеткішке ие. Мұнан өзге, Созақ ауданының құрылыс саласында да былтыр жалпы соммасы 1 млрд. 788 млн. теңгені құрайтын қаржыға қыруар тірлік атқарылған. Мәселен, өткен жылы 4 білім мекемесі мен Тасты ауылында 50 орындық балабақша құрылысы аяқталып пайдалануға берілді. Ал дәл қазіргі таңда аймақ бойынша тағы 3 мектеп, 1 балабақша және Шолаққорған ауылында 50 тұрғын үйдің құрылыс жұмыстары басталған. Аталмыш әлеуметтік нысандардың барлығы да биылғы жылы пайдалануға беріледі деп күтілуде. Мұнан өзге «Жұмыспен қамту», «Балапан» бағдарламаларының орындалу барысына тоқталған аудан әкімі мектеп жасына дейінгі бүлдіршіндердің 81,3 пайызы балабақшамен қамтылғанын жеткізді. Сондай-ақ, Созақтағы жол, ауыз су мәселелерін шешу бағытындағы жұмыстарды да жан-жақты баяндады. Осы және өзге де атқарылған ауқымды жұмыстарды сөз еткен аудан басшысы облыс әкімі Бейбіт Атамқұловтың Созақ ауданынан түйе сүтін жинау пункттерін ашу жобасының жүзеге асырылу бағытына да тоқталып өтті.
Осылайша ауданның әлеуметтік экономикалық дамуы мен алда тұрған міндеттерді баяндаған Мақсат Исаев БАҚ өкілдерінің сан салалы сауалдарына да жауап берді. Теріскей өңірінде атқарылған жұмыстар баршылық, ал алдағы уақытта аудан экономикасын жандандыруға арналған инвестициялық жобалар да ел әлеуетін арттыруға үлес қоса бермек.
Абай ОМАР
