Бүгін облыс әкімдігінде Оңтүстік Қазақстан облыстық Қоғамдық кеңесінің кезекті отырысы өтті. Кеңес отырысына облыстық мәслихаттың хатшысы Қ.Балабиев, облыс әкімі аппаратының басшысы Ә.Тұрғымбеков, облыс әкімінің орынбасарлары Ұ.Сәдібеков, Т.Сәрсембаев және облыстық қоғамдық кеңес мүшелері мен облыстық басқарма басшылары қатысты.
Отырысты облыстық қоғамдық кеңестің төрағасы, облыстық мәслихаттың депутаты Ө.Мелдеханов жүргізіп отырды.
Кеңестің бүгінгі күн тәртібінде «Шымкент қаласының мәртебесі туралы» негізгі мәселенің бірі қаралды.
Қазақстан Республикасының 1993 жылы 8 желтоқсандағы №№2572- ХІІ «Қазақстан Республикасының әкiмшiлiк-аумақтық құрылысы туралы» Заңында республикалық маңызы бар қалаларға халқының саны бiр миллион адамнан асатын елдiмекендер жатады деп көрсетілген.
Айта кетейік, жуырда Мемлекет басшысы өз сөзінде «Қазақстан агломерацияны дамыту стратегиясын жүзеге асыруды бастады. Егер бізде бұған дейін миллион тұрғыны бар тек Алматы қаласы болса, қазір үш мегаполисіміз бар – Алматы, Астана және Шымкент қалалары» деп атап өтті. Осыған байланысты, бүгін таңда өткен Шымкент қалалық мәслихаттың кезектен тыс жиырма тоғызыншы сеесиясында қала мәртебесі туралы бірлескен шешім қабылданып, қол қойылған болатын. Осы мәселе кеңес отырысында қайта қаралып, кеңес мүшелерінің дауысымен бірауыздан мақұлданды.
Сонымен қатар, Қазақстан Республикасының Президенті Жарлығының «Оңтүстік Қазақстан облысының әкімшілік орталығын көшіру туралы» және «Оңтүстік Қазақстан облысының шекарасын өзгерту туралы», сондай-ақ, Қазақстан Республикасы Үкіметі Қаулысының «Оңтүстік Қазақстан облысы Түркістан және Кентау қалаларының шекараларын өзгерту туралы» Қазақстан Республикасы Үкіметі Қаулысының жобалары қаралып, мақұлданды.
Халық қалаулылары бас қосқан жиында одан басқа да төмендегі бес мәселе қаралды.
«Оңтүстік Қазақстан облыстық мәслихатының 2017 жылғы 11 желтоқсандағы №18/209-VI «2018-2020 жылдарға арналған облыстық бюджет туралы» шешіміне өзгерістер мен толықтырулар енгізу туралы», «Азаматтардың жекелеген санаттарына амбулаториялық емдеу кезінде тегін дәрілік заттарды қосымша беру туралы», «Оңтүстік Қазақстан облысы бойынша әлеуметтік маңызы бар қатынастардың тізбесін айқындау туралы», Оңтүстік Қазақстан облысы бойынша қоршаған ортаға эмиссия үшін төлемақы ставкалары туралы» мәселері қаралды.
Қоғамдық Кеңес отырысының күн тәртібіндегі мәселелер кеңес мүшелерінің дауысымен бірауыздан мақұлданды.
Жомарт БЕГІМБЕТ.
