Назарбаев қазақстандықтарды Әсет Исекешевтен үлгі алуға шақырды

Әсет Исекешев қыркүйектен бастап колледж студенттеріне арналған мемлекеттік-жекешелік серіктестік аясында жатақхана құрылысы бойынша пилотты жоба іске қосылатынын айтты.

«11 мемлекеттік колледжге қолда бар салынған ғимараттардың алаңын пайдалантын боламыз. Біріншіден, бұл мәселені тез шешеді, яғни қаламызда колледж студенттері үшін жатақханадан 2 мың орын жетіспейді. 1 қыркүйектен олар жатақханада тұратын болады. Екіншіден, бұл жаңа жұмыс орындарын құруда кіші және орта бизнеске қолдау көрсетеді», — деді Астана қаласының әкімі.

Сондай-ақ ол Астанада «Цифрлық Қазақстан» бағдарламасы қалай жүзеге асырылып жатқаны туралы айтты.

«1 қыркүйекке дейін смарт-білім беру, смарт-медицина, Е-КСК, Биг-дата бойынша жұмыстар аяқталады. Бірыңғай геоақпараттық жүйе мен интеллектуалды транспорттық жүйе бойынша жұмыстарды 2019 жылға қарай бітіреміз деп отырмыз. Яғни, 2019 жылға дейін Астанада «ақылды қала» қаңқасы қалыптасады», — деді Исекешев.

Исекешевтің баяндамасын тыңдаған Президент Астана қаласы әкімінің жұмысына баға берді.

«Алға қойған жоспарларды қалай орындау керектігі туралы Астана лайықты үлгі көрсетіп отыр. Егер осының бәрі жүзеге асса, басқалар үшін бұл жақсы үлгі болмақ. Бүкіл Қазақстан сенен үлгі алады деп ойлаймын», — деді Президент Әсет Исекешевке.