Жуырда өткен саяси додада Бәйдібек ауданына қарасты 13 ауылдық округ бойынша халықтың сеніміне ие болып аудандық мәслихат депутаты атанған халық қалаулылары бүгін алғашқы сессияда бас қосты. Ал бұл күнгі күн тәртібіндегі басты мәселе ол аудандық мәслихаттың хатшысын сайлау болатын. Сондай-ақ, мәслихаттың тұрақты комисияларының төрағалары мен мүшелерін сайлап алу да нақ осы сессия отырысының күн тәртібінен орын алған. Осы ретте аудан әкімінің қатысуымен өткен алтыншы шақырылымдағы аудандық мәслихаттың алғашқы сессиясына депутат Бағдат Қалаубай төрағалық етсе, күн тәртібі бойынша аудандық сайлау комиссиясының төрағасы Марат Қырықбаев өткен сайлаудың қорытындысы бойынша баяндама жасады. Айтуынша, 13 округ бойынша сайлауға жалпы саны 41 үміткер ұсынылса, оның 39-ы тіркеліп саяси науқанға қатысып бақ сынаған. Нәтижесінде, әрбір сайлау округінен ел сеніміне ие болған 13 азамат аудандық мәслихат депутаты атанып отыр. Өткен сайлаудың барысы баяндалған сессия отырысындағы негізгі мәселенің бірі аудандық мәслихаттың хатшысын сайлау болатын. Бұл ретте мәслихат хатшылығына бұл жолы депутат Мұқадас Нақыпбековтың кандидатурасы ұсынылды. Ұзақ жылдар бойына ұстаздық салада еңбек етіп, қызметтің түрлі сатыларынан өткен Мұқадас Әуенұлы 2002 жылдан бері Бәйдібек аудандық білім бөлімінің басшысы қызметін атқарып келген. Ал жуырда өткен сайлауда ол №10 Жамбыл округі бойынша сайлаушылардың басым дауысына ие болып халық қалаулысы атанған. Аудандық мәслихаттың хатшылығына ұсынылған үміткер Мұқадас Нақыпбековтың кандидатурасы бұл ретте депутаттар тарапынан бірауыздан қолдау тапты. Осылайша Мұқадас Әуенұлы Бәйдібек аудандық мәслихат хатшысы болып сайланды.
Сонымен қатар, бұл күнгі сессия отырысында аудандық мәслихаттың тұрақты комиссияларының да жаңа құрамы бекітіліп олардың мүшелері мен төрағалары сайланды. Сонымен бюджет, экономика және әлеуметтік даму жөніндегі тұрақты комиссиясының төрағасы болып бірауыздан депутат Бағдат Қалаубай сайланса, Заңдылықтарды қамтамасыз ету және азаматтардың құқықтарын қорғау жөніндегі комиссиясының төрағасы болып №9 Ақбастау округінен депутат атанған Бақыт Омарбеков сайланды. Ал, өз кезегінде аудан әкімі Батырбек Көшербай жаңадан жасақталған мәслихаттың алдағы жұмысына сәттілік тілеп, бұған дейінгі 5 шақырылымда мәслихат хатшысы қызметін атқарған депутат Салқынбек Сыпабековке өз алғысын білдіріп өтті. Ал мұнан соң сессия отырысының күн тәртібіне сәйкес мәслихаттың жаңа хатшысы мен аудан әкімі Батырбек Көшербай халық қалаулыларына салтанатты түрде депутаттық куәліктерді табыс етті. Олардың арасында аудандық мәслихаттың 6-шақырылымында №8 Бөген сайлау округінен басым дауысқа ие болып халық қалаулысы атанған «Мырзахмет ата» ӨК-нің төрағасы Айдар Байысбеков те бар.
Алғашқы сессияда депутаттық куәліктеріне ие болған халық қалаулыларымен бірге аудан әкімі бұл күні жаңадан сайланған мәслихат хатшысы Мұқадас Нақыпбековты жаңа қызметтегі жұмыс кеңсесіне жайғастырып, іскер азаматтың алдағы жұмысына сәттілік тіледі. Бұл ретте аудандық мәслихат депутаттары да Мұқадас Әуенұлына өз құттықтауларын білдіріп жатты.
Абай Омар
