Мерекелік шараның шымылдығы театрландырылған музыкалық қойылымымен ашылды. Сахна төріне шыққан түрлі ұлт өкілдері Қазақстанның бірлігі мен ынтымағын ұлықтап, қазақ еліне алғыстарын жеткізді. Достық пен берекенің мейрамында алғашқы болып сөз алған аймақ басшысы Жансейіт Түймебаев Оңтүстікқазақстандықтарды 1 мамыр – Қазақстан халқының бірлігі күні мерекесімен шын жүректен құттықтады.
«Қазақстан халқының бірлігі күні мерекесі — бүгінгі таңда бейбіт өмір мен ынтымақта тұрмыс кешіп отырған ел тұрғындары үшін ыстық ықылас пен достық ниеттің дәстүрі, асыға күтер мейрамы. Елбасымыз Н.Ә.Назарбаевтың салиқалы саясатының арқасында ел аумағында жүзден астам этнос өкілдері тату-тәтті өмір сүруде. Осының нәтижесінде Қазақстан ынтымағы жарасқан, ырысы артқан елге айналды. Мемлекетіміздің басты байлығы – қоғамдағы келісім мен татулықты сақтау ісіне әрбіріміз жауаптымыз. Қазақстан халқының бірлігі мерекесі құтты болып, баршаңыздың шаңырақтарыңыздан шаттық кетпесін», — деді Жансейіт Қансейітұлы.
Кейін облыс басшысы өңірдегі этно-мәдени орталық өкілдеріне «Бауырмал» сыйлығын тапсырды. Олардың қатарында облыстық «Ынтымақ» ұлтаралық мәдениет орталығы» қоғамдық бірлестігінің төрайымы Г.Төлепова, облыстық «Татар-башқұрт мәдени орталығы» бірлестігінің төрайымы А.Мухамедова, «Қазақстан кәрістері ассоциациясы» Республикалық қоғамдық бірлестігінің Оңтүстік Қазақстан облыстық филиалының төрайымы Р.Пак , облыстық түрік этно-мәдени бірлестігінің төрағасы Латипша Асанов сынды орталық басшылары бар.
Мерекелік шара «Көңілді дастархан» — вокалды хореографиялық композициямен және «Әлем ырғағы» атты түрлі ұлт аспаптардың орындауында музыкалық қойылыммен жалғасын тапты.
