«Әйел және бизнес – ашық диалог». Дәл осы тақырыпта шаһарда әйелдер кәсіпкерлігін дамыту бойынша бизнес-конференция ұйымдастырылды. Бұл шараға аймақтардан 100-ге жуық әйел заты қатысты. Олардың ішінде бизнесті жаңадан үйреніп жатқандар мен майталман бизнесвумендер бар. Олар өздерінің кәсіптерінде кездескен түйіткілді мәселелері мен табыстары туралы бөлісу үшін арнайы облыс орталығында бас қосып отыр. Еске сала кетсек, 2015 жылы ОҚО Кәсіпкерлер палатасы жанынан Іскер әйелдер кеңесі құрылған болатын. Оның құрамында 120 жуық аудан және қалалардан жиналған белсенді әйелдер бар. Бұл кеңес нәзік жандылардың бизнес қауымдастығына заңдық және практикалық көмек көрсетеді. Бүгінде, қыз-келіншектердің кәсіпкерлікке деген ұмтылысы артып келеді.
