Бүгін ҚР Мемлекеттік қызмет істері және сыбайлас жемқорлыққа қарсы іс-қимыл агенттігі Астана қаласының Әділет департаментінде «Астана – адалдық алаңы» жобасы шеңберінде көшпелі кеңес өткізді. Жиында Агенттік төрағасының көмекшісі Хәкім Құшқалиев сот орындаушылар арасында жемқорлар көбейіп бара жатқанын айтты, деп хабарлайды Baq.kz.
«Бүгінгі кездесуімізге Әділет департаменті қызметкерлеріне, соның ішінде сот орындаушыларына қатысты қылмыстық істердің қозғалуы себеп болды. Екі жылдың ішінде республика бойынша 40 әділет қызметкері қылмыстық жауапкершілікке тартылды, олардың жартысы — сот орындаушылар. Астанада соңғы екі жылда ұсталған 10 адамның төртеуі — сот орындаушылар», — дейді Хәкім Құшқалиев «Сыбайлас жемқорлыққа қарсы іс-қимыл шараларын қабылдау» тақырыбындағы жиында.
Оның айтуынша, қазіргі уақытта Астана қаласының Сыбайлас жемқорлыққа қарсы қызметі Әділет Департаменті басшысының орынбасары Рамазанов және Басқарма басшысы Дәулетбаевты «Астана қалалық жарық» ЖШС-тің атқару ісін тоқтату үшін пара алған кезінде ұстап, қылмыстық іс қозғады.
«Біз өз Агенттігіміздің атынан бұдан әрі қарай жемқорлық қылмыстарды болдырмау мақсатында өз ұсыныстарымызды жеткіздік. Мысалы, Сот орындаушыларының өзінің мамандандырылған заңы бар («Атқарушылық іс жүргізу және сот орындаушылар мәртебесі туралы» заң – авт). Бірақ, сол заңға бірнеше жаңа ереже, жаңа ұсыныс енгізу тиіс деп санаймыз. Мысалы, заңда «сот орындаушы құқылы» деген тіркес жиі кездеседі. Бірақ, заңда оларға бұндай өкілеттіктер берілмеу керек. Заңда «сот орындаушы осыны істеу керек немесе істеуге міндетті» деп нақтыланып жазылу керек. Сот орындаушыға «сен былай істе, не басқаша жаса» деп таңдау құқығын бермеу керек. Бұл дұрыс емес. Екіншіден, заңда мерзім жағын қарастыру қажет. Сот орындаушылардың көбі сот тарапынан шыққан шешімдерді уақытында орындамайды. Сот үкімдері шыққанымен көбі орындалмай жатыр. Оның бір себебі — осы заңда да тағы бір шикіліктің кездесуінен. Сот орындаушыға екі ай мерзім берілгенімен, заңның келесі нормасында «сот орындаушы мен талап-арыз берген азаматтың арасында жазбаша шартқа қол қойылып, сот орындаушы өзі мерзімін бекітеді» делінген. Әрине, сот орындаушы бір айда шеше ме, алты айда шеше ме, ақшасын созып жүре беруі мүмкін. Біз бұл әділдікке қайшы келетін ереже деп санаймыз», — деді Құшқалиев.
Сондай-ақ, маманның айтуынша, Қазақстанда қылмыстық заңнаманың репрессивтілігін төмендету бойынша шаралар қабылданған.
«Егер азаматтың отбасы, тұрғылықты тұратын жері, балалары болса, және ол өз кінәсін мойындап тұрса, неге біз оны тергеу абақтысына қамауымыз керек? Біз осылайша елімізде түрмеде отырғандар санын жасанды түрде ұлғайтамыз. Бұл біз бен сіздің салығыңыз. Қазір біз отырғызамыз, бірақ бұрынғыдай бәрін емес. Биылдан бастап Қазақстанда сыбайлас жемқорлық жасады деген күдікпен ұсталғандар қамалмайды. Оларға қатысты негізінен қамаумен байланыссыз бұлтартпау шаралары қолданылады», — деді Агенттік өкілі.
