Үкімет отырысында Шығыс Қазақстан облысының әкімі Даниал Ахметов ҚР Премьер-министрі Бақытжан Сағынтаевтан өңірдегі төтенше жағдайлар департаментін тиісті құрал жабдықпен қамтамасыз ету қажеттігін айтып, көмек сұрады, деп хабарлайды Baq.kz.
Отырыста Даниал Ахметов облыстағы су басқан елді мекендерде тиісті жұмыстар жүргізіліп жатқанын, жағдайдың бақылауда екенін атап өтті. Кейін облыс әкімі өңірлегі өзекті мәселеге тоқталды.
«Бақытжан Әбдірұлы, (ҚР Премьер-министрі Бақытжан Сағынтаев) төтенше жағдайлар департаментінде тиісті құрал-жабдықтар жоқ. Мысалы, облыста 249 көшпелі мотопомпа болу керек. Ал бізде 55 көшпелі матакомба. Ең керегі осы ғой. Қайыққа тоқталайық. Ол 69 болу керек. Ал бізде 14 қайық бар. Жол талғамайтын көлік (Вездеход) 55 болу керек. Оның біреуі де жоқ. Көлік жоспар бойынша 55 болу керек. Облыста тек 9 көлік бар», — деді Даниал Ахметов.
Сонымен қатар ол өңірдегі құтқарушылардың арнайы киімі жоқ екенін жеткізді.
«Жігіттеріміз судың басында жүр ғой. Оларға гидрокомбинезон керек. Жоспар бойынша 1 мың болу керек, Ал бізде 86 гидрокомбинезон бар. Бақытжан Әбдірұлы, (ҚР Премьер-министрі Бақытжан Сағынтаев), осы жағдайға назар аударайық. Осы жылдың басында осы салаға 300 млн теңге бөлдік. Қазір тағы да 200 млн бөліп тұрмыз. Бірақ осы мәселені бірігіп шешудің, бір жолын тауып беріңіз», — деді ШҚО әкімі.
