Қазақ-өзбек автоөнеркәсібі көлік шығаруды арттырады

Әндіжандағы машина жасау зауыты көліктің бес түрін шығарады. Мұнда жанармай шығыны аз, шағын машиналардан бастап жол талғамайтын темір тұлпарға дейін құрастырылады. Кәсіпорын бүгінде сол көліктерге қажетті қосалқы бөлшектердің 75 пайызын өздері шығарады екен.

Кәсіпорындағы алып қондырғыдан шығып жатқан қосалқы бөлшектердің басым бөлігі Қазақстанға жіберіледі. Өзбекстандық мамандар енді жол талғамайтын көліктің жаңа түрін ойлап тауыпты. Бұл бұйыртса тұтастай отандық өнім болады, дейді зауыттағылар.

Иқболжан Ташабосов, зауыттың сапа бөлімінің басшысы:

— Жаңа «ТРЕКС» деген жол талғамайтын көлік. 2020 жылы шығаруды бастаймыз деген жоспар бар. Барлық бөлшектері зауыт линиясында жасалады. Конвейерден шығып жатқан әрбір екінші көлік экспортталады. Болашақта бұл көрсеткішті 80 пайызға жеткізуді көздеп отырмыз.

Қос тарап биылдан бастап бірлесіп құрастыратын көлік санын 7 мыңға дейін жеткізбек. Бұл екі елдің машина жасау саласындағы ынтымақтастық байланысының екінші кезеңінде атқарылатын маңызды шаруалардың бірі болмақ. Бауырлас елдер ұзақ мерзімді стартегиялық жоспардың арқасында ішкі нарықпен қатар көрші елдерде сұранысқа ие  жеңіл машинаның жаңа түрін құрастырып шығаруға қол жеткізді. Ол көліктер  бәсекеге қабілетті екенін көрсетті.

Ерік Өтембаев, Қазақстан Республикасының Өзбекстандағы төтенше және өкілетті елшісі:

— Машина жасау өндірісіндегі кооперациялық байланыс үлкен мүмкіндіктерге жол ашады. Соның негізінде өндірістің тағы бір жаңа  түрін қалыптастырдық. Бұл Елбасы жолдауында айтылған жаңа өндірістік ревалюция негізінде бәсекеге қабілетті өнім шығаратын ірі өндіріс орынын құруға мүмкіндік берді. Біз машина жасау саласы бойынша ғана емес ішкі нарықта сұранысқа ие ауылшаруашлығы техникаларын шығаратын кластер құру жағын да қарастырып жатырмыз. 

Өзбекстанда бірнеше машина жасау өндірістік аймағы құрылған. Әндіжанда жеңіл көлік. Самарқандта автобус. Ал Ташкентте ауыл шаруашылығы техникасы шығарылады. Болашақта екі ел арасында ірі машина жасау кластерін құру жоспарланып отыр. Оған қоса қосалқы бөлшектер де жергілікті жерде шығарылмақ. Яғни автоөндірістегі отандық үлес салмағын арттыру бірінші межеде тұр.

Дереккөз: 24.kz