Жергілікті полиция жұмысы жүйеленбек

Елбасымен бекітілген «Ұлт жоспары — 100 нақты қадамды» жүзеге асыруға құқықтық статистика және арнайы есепке алу органы өз үлесін қосуда. Сондай-ақ, прокуратура, әкімдік және жергілікті полиция органдарымен бірлесіп қызмет атқаруда, — деді ОҚО Аймақтық коммуникациялар қызметінде өткен брифингте ҚР Бас прокуратурасы құқықтық статистика және арнайы есепке алу жөніндегі Комитетінің ОҚО бойынша басқармасы бастығының орынбасары Әріпхан Пірімбеков. Осы мақсатта аталған орган Ұлт жоспары аясында құрылған жергілікті полиция қызметкерлеріне жұмысын ұйымдастыруға және бағалауға қажетті шынайы және толық ақпарат көздерін ұсынуға дайын екенін жеткізді. Құқықтық статистика және арнайы есепке алу органдары өз құзіреті шеңберінде жалпы тіркелген қылмыстар саны, оның түрлері, осы қылмыстардың қай жерде, кімдермен және қалай жасалғаны, яғни қоғамдық орындарда, бұрын сотталған адамдармен, мас күйінде, кәмелет жасқа толмағандарға, әйелдерге қатысты жасалғаны, сондай-ақ, олар бойынша қабылданған процессуалдық шешімдер туралы және тағы басқа да мәліметтерді жинақтап, электрондық картаға тіркейді. Бұл мәліметтерді жергілікті полиция органы қызметін ұйымдастыру үшін Комитеттің «Ақпараттық сервис» жүйесі арқылы статистикалық мәлімет түрінде немесе геоақпарат түрінде ала алады. Ол үшін ғаламтордағы service.pravstat.kz электрондық мекен-жайына жүгінсе жеткілікті. Айта өту қажет бұл қызмет интернетте кез-келген азаматқа қол жетімді. 2012 жылы іске қосылған электрондық картаның құрылу мақсаты — қылмыстық құқықбұзушылықтар туралы ашық мәліметтермен қоғамды ақпараттандырып, барынша олардың қауіпсіздігін қамтамасыз ету. Қылмыс туралы ақпарат тіркелген соң, мәлімет автоматты түрде 2-3 минутта картада көрсетіледі. Сондай-ақ, картада жол-көлік оқиғасы бойынша егжей-тегжейлі мәлімет алуғада болады. Бұл сәйкесінше, жергілікті полиция мен әкімдік үшін жол қауіпсіздігін сақтау бойынша, ал жүргінші мен жүргізуші үшін өзінің қауіпсіздігін қамтамасыз етуге қажетті шешім қабылдауға мүмкіндік береді. Ал, жыл басынан бері «Тұлғалардың жүгіну картасы» жұмыс жасауда. Мұнда облыс, қала, ауданға шаққанда мемлекеттік органдарға түскен өтініштер саны, түрі, қандай мәселемен жүгінгені туралы ақпарат беріледі.