ҚР Тұңғыш Президенті күніне орай мемлекетаралық Украина-Қазақстан қатынастары институтына Нұрсұлтан Назарбаевтың есімі берілді.
Бұл институт 70 жылдық тарихы бар «Білім» қоғамының құрамына енеді.
«Білім» қоғамының құрамына енетін Украина-Қазақстан қатынастары институтының құрылғанына биыл 15 жыл толып отыр. Осы институттың қажеттілігін Президент Нұрсұлтан Назарбаев 2004 жылы әйгілі украин академигі Федор Моргунмен кездесу барысында тілге тиек еткен еді. Бүгінде бұл қоғамдық институт Қазақстан жайлы танымдық-ақпараттық материал және кітап шығарумен айналысып келеді.
Василь Кушерець, «Білім» қоғамының басқарма төрағасы, профессор:
— Қазақстанның мемлекеттік басқару теориясы, жаңа замандағы Қазақстанның мемлекеттік деңгейдегі жетістігі, ел басқару философиясы – Украина қоғамы үшін қажет ілімнің бірі. Біз осындай тақырыптарды тереңнен зерттеп, ғылыми материал шығарумен айналысып келеміз.
15 жылда институт және украинадағы Қазақстан Елшілігінің тікелей қолдауымен Қазақстан және оның басшысы туралы 15 кітап жарыққа шыққан. Бірқатар ғылыми-танымдық материалдың әрі Қазақстан жайлы 10-ға жуық еңбектің авторы – жазушы Николай Степаненко. Ол өз сөзінде: «Институт Қазақстанның Украинадағы оң имиджін арттыруға тікелей атсалысып келеді», – дейді.
Николай Степаненко, Мемлекетаралық Украина-Қазақстан қатынастары институтының директоры:
— Мемлекетаралық Украина-Қазақстан қатынастары институтының мүшелері бірауыздан институтқа Нұрсұлтан Назарбаевтың есімін беру туралы шешім қабылдады. Бұл – біз үшін үлкен мәртебе және зор жауапкершілік жүгін артады. Біз Қазақстан халқына осы атаудың атына кір келтірмей, керісінше қазақ-украин қарым-қатынасын арттыра түсу жолында еңбегімізді аямаймыз деп уәде береміз. ҚР Тұңғыш Президенті күні құтты болсын!
Институт қызметкерлері жаңа жылдан бастап Қазақстанның экономикалық және саяси реформалары, Мемлекет басшысының қазақ халқы ғана емес, әлемге әйгілі тарихи шешімдері жайлы тың еңбек жариялаймыз деп жоспарлап отыр. Оның бір тарауы 29 тамыз – халықаралық ядролық сынақтарға қарсы күрес күніне арналмақ.
Дереккөз: 24.kz
