Шаһар басшысы Ғабидолла Әбдірахымовтың төрағалығымен еінші рет қалалық білім бөліміне қарасты №118 «Көкбұлақ» жалпы орта мектебі мен №71 жалпы орта мектебі директорларының бос лауазымдық қызметіне ашық конкурс өткізілді. Іріктеу сыны бойынша облыс орталығындағы екі бірдей білім ұясы басшылығына үміткерлер таңдалды. Білім ұясының басшылық қызметіне тағайындаудың жаңаша үрдісі ең алдымен, сыбайлас жемқорлықтың алдын-алу үшін таптырмас тәсіл. Тағы бір оңтайлы тұсы – директорлық лауазымға өз ісінің білгірлері ғана таңдалып алынады. Мұндай тәжірибе түстікте тұңғыш рет қолданылып отыр. Комиссия мүшелері мұндай сүзгіден өтіп барып, тағайындалған директор кадр сапасына жеңіл-желпі қарамайтындығын айтып өтті.
Үміткерлер жеке-жеке Қазақстан Республикасының Заңдарын қаншалықты білетіні, құқықтық нормативтік құжаттар, ұжымды басқарудағы, оқу әдістемелік процесін жақсарту жолындағы біліктілігі сарапқа салынды. Алғашқы сын бойынша №71 жалпы орта мектебінің басшылық лауазымынан 6 үміткер комиссия қабылдауына қатысты. Солардың ішінен мектеп директорлығы лауазымына Орынбай Қамысбаев лайық деп танылды.
Ал, №118 жалпы орта мектебіне 2 үміткер қатысып, біліктілігі, басшылық қабілеті жағынан Әбу Қалмұрат Әбенұлы осы лауазымға тағайындалды. Осыған орай шаһар басшысы Ғабидолла Рахматоллаұлы бүгін аталмыш мектеп ұжымына арнайы барып, жаңа директорларды таныстырды.
Естеріңізге сала кетейік, бұған дейін мектеп директорлары Білім басқармасының ұйғарымымен ғана тағайындалатын. Енді, шаһар басшысы алдағы уақытта қаладағы білім жүйесіне ерекше көңіл бөлмек. Сонымен қатар, алдағы уақытта мектептердің барлығына бақылау жүйесін енгізу жоспарлануда.
