Ресей Федерациясының екінші алпауыт қаласы Санкт Петербург — бұрыннан сапалы білімнің ордасы ретінде бағаланады. Сондықтан, қазақстандық ізденімпаз жастардың білім нәрімен сусындауға осы қалаға ұмтылуы заңдылық та болар. Санкт-Петербургте 62 ЖОО бар. Онда 3500-ге жуық қазақ жастары білім алады. Қуантарлығы ОҚО-дан студенттер көп. Жерлестеріміз Питердің маңдайалды Университтерінде ауыл шаруашылығы, темір жол, экономика салаларын меңгеруде.
24 қараша күні кешкісін Казан соборы алаңында Оңтүстік делегациясы Шымкенттік жастармен кездесті. Олар туған бауырларын көргендей қуаныштарында шек болмады. Өзін Жанниет деп таныстырған шымкенттік қыз осындағы қазақ ұл-қыздарын ұршықша иіріп жүр.
Жанниет Санкт-Петербургтегі қазақ студенттерінің өмірі, тынысы туралы айтып берді. Бір-бірімен тығыз қарым-қатынаста тұратын жерлестер «Достар» қазақ жастары ұйымымен жиі жолығып, бір-бірлеріне қолдау көрсетеді. Питердегі қазақ студенттері бос уақытында түрлі үйірмелерге қатысады, жұма сайын мешітке барып, сенбі күндері бас қосып, «Достық» шайын ішеді. Қазығұрт, Төлеби, Ордабасы, Сайрам аудандары мен Шымкент қаласының жастары басым. Елге дұғай-дұғай сәлем жолдаған, Оңтүстік жастары міндетті түрде Қазақстанға ораламыз дейді.
«Айғақ-ақпарат».
