Қазақ елінің қатпарлы тарихында ел үшін жанын пида еткен асылдарымыздың есімін жаңғыртып, ұрпақ жадында ұлықтау мақсатында таңертең Ресей астанасына жолға шыққан Оңтүстікқазақстандық делегация бабалар рухына тағзым жасауда. Яғни, ұлт зиялылары Тұрар Рысқұлов, Нәзір Төреқұлов, Сұлтанбек Қожановтар жатқан Коммунарка зиратына арнайы барды.
Жиырмасыншы ғасырдың басында ортақ мүдде жолында ой біріктіріп, тізе қосып, қызыл империядан қаймықпай тәуелсіздік жолында құрбан болған Алаш ардақтыларының басына гүл шоқтарын қойып, рухына Құран бағыштады.
Мұнан кейін, қазақтан шыққан жалынды жас, көшбасшы болған Ғани Мұратбаев жерленген Ваганьков зиратына да арнайы барып, рухына тағзым жасап, гүл шоқтарын қойды.
Айта кетейік, делегация құрамында: ОҚО мәслихатының депутаты, ОҚО Қоғамдық кеңесінің мүшесі Дулат Әбіш, Абай ауданы ардагерлер кеңесінің төрағасы Ұлықпан Бәшенов, ОҚО мәслихатының депутаты Лесбек Тәшімов, Шымкент қаласының Құрметті азаматы, «Ұстаз нұры-информ» газетінің бас редакторы Әнуарбек Бейсе, Созақ, Шардара, Түлкібас аудандары мен Түркістан, Шымкент қалаларындағы қуғын-сүргін құрбандарына арналған музей директорлары және ғылыми қызметкерлері бар.
«Айғақ-ақпарат».
