Қазақ елінің қатпарлы тарихында ел үшін жанын пида еткен асылдарымыз. Жиырмасыншы ғасырдың басында ортақ мүдде жолында ой біріктіріп, тізе қосқан қазақтың зиялы шоғыры ұлтын өрге сүйреп, ел мүддесін көкседі. Олар қазақ даласында тұңғыш дербес саяси Алаш партиясын құрып, қызыл империядан қаймықпай күресіп, тәуелсіздік жолында құрбан болды. Сондықтан да әрқашан да ұлы тұлғалар Тұрар Рысқұлов, Нәзір Төреқұлов, Сұлтанбек Қожанов, Әлихан Бөкейханов секілді ұлт зиялыларының есімін ұлықтау парызымыз.
«Айғақ» телеарнасының рухы биік, мақсаты ізгі, бітімі оқшау жаңа туындысы Ресей мемлекетінде жүзеге аспақ. Осы мақсатта, ОҚО-нан 18 адамнан құралған делегация қараша айының 21-ші жұлдызында Шымкент қаласынан Ресей астанасына жол тартты.
Делегация құрамында: ОҚО мәслихатының депутаты, ОҚО Қоғамдық кеңесінің мүшесі Дулат Әбіш, Абай ауданы ардагерлер кеңесінің төрағасы, «Құрмет» орденінің иегері Ұлықпан Бәшенов, ОҚО мәслихатының депутаты Лесбек Тәшімов, Шымкент қаласының Құрметті азаматы, «Ұстаз нұры-информ» газетінің бас редакторы Әнуарбек Бейсе, «Қоғамдық келісім» мекемесінің Шардара ауданындағы төрағасы Қыстау Ілесов, еңбек ардагері, Махмудбек Мұхамедов, ОҚО Өзбек драма театрының директоры Икрам Хошимжанов, Түлкібас ауданы Т.Рысқұлов музейінің директоры Лесбек Махмудов, Созақ ауданы С.Қожанов музейінің директоры Ниязәлі Дүйсенбек, ОҚО саяси қуғын-сүргін құрбандары музейінің ғылыми қызметкері Нұрсұлу Тулеева, Түркістан қаласы Н.Төреқұлов музейінің меңгерушісі Динара Керімбекова, Бәйдібек ауданы «Шаян» газетінің бас редакторы Абзал Әділбеков, Созақ ауданы С.Қожанов атындағы жалпы орта мектебінің директоры Мейрам Әлмаханов, «Біз біргеміз» қоғамдық бірлестігінің жетекшісі Абай Аңдабаев және «Айғақ» телеарнасының түсірілім тобы бар.
Елдің еңсесі мен рухын көтерген рухани жаңғыру аясында делегация мүшелері қазақ қайраткерлері жерленген, Мәскеудегі Коммунарка зиратына барып, Құран бағыштайды. Қазақтан шыққан ұлы тұлғалар жайында «Айғақ» телернасы құнды хабарлар әзірлейді.
Ендеше, атамекеннен алыста бакилық болған арда азаматтардың сан-салалы мұрасын насихаттап, ұлттық сананы көтеріп, ұрпақ бойына сіңіруді мақсат тұтқан арнамыздың рухани дүниеге толы кезекті жобасын жуырда көгілдір экрнаннан күтіңіздер.
«Айғақ-ақпарат».
