Елбасының Қазақстан Республикасының «Жасыл экономикаға» көшу туралы тұжырымдамасы туралы» Жарлығымен іске асыру мақсатында Шымкент қаласында «Су ресурстары-маркетинг» ЖШС қолдауымен қуаты 0,5 МВт биогаз қондырғысы іске қосылды. Бүгін биогаз өндіретін құрылғының салтанатты ашылу рәсімі өтті. Шара барысында Облыс әкімі Жансейіт Түймебаев аталған жобаның лентасын қиып, алғаш болып қондырғының жұмысын іске қосты.
Чехиялық «HEDVIGA GROUP» АҚ компаниясының жаңа технологиялары қолданылады. Өңдеген шөгінділерден биогаз бөлінеді, ол өз кезегінде жылу және электр энергия көзі болып табылады. Электр энергия газгенераторларында биогазды жағу арқылы өндіріледі. Технологиялық процеске сәйкес қондырғы қалдықтарды өңдеу арқылы тәулігіне 300 метр куб метанды биогазды өндіреді. Сонымен қатар, бұл жоба Орта Азия елдері арасында алғаш іске қосылған қондырғылардың бірі болып табылады. Жобаның ерекшелігі екінші ретті энергоресурстарды барынша тиімді пайдалануында.
Құрылыс жұмыстары 2015 жылы басталып, ағымдағы жылы толығымен аяқталады. Жобаның құны 2 млрд. теңгені құрайды. Құрылыс жүргізу барысында 30 адам, іске қосылғаннан кейін 20 адам тұрақты жұмыс орнымен қамтылады.
Жансая Елемесова
