Бүгін Мəжілісте құқық қорғау қызметінің процессуалдық негіздерін жаңғырту мəселелері жөніндегі заң жобасы қаралды. Заң жобасын таныстырған ҚР Бас прокуроры Жақып Асанов заңның басты ерекшеліктерін атап өтті, деп хабарлайды Baq.kz ақпарат агенттігі.
«Заңды жетілдіру — тоқтамайтын процесс. Әр мемлекет өзінің ішкі жағдайына қарай заңға біртіндеп, таразылап, кезең-кезеңмен өзгерістер енгізіп тұрады. Бүгінгі заң жобасы сондай кезекті бір қадам болып отыр», — деді Жақып Асанов.
Сондай-ақ, Бас прокурор осы заң жобасына қатысты Елбасының алға үш мақсатты қойғанын атап өтті.
«Елбасы біздің алдымызға үш мақсатты қойды. Біріншіден, қылмыстық іс-жүргізу кодекске қарапайым адамның көзімен қараңдар деді. Екіншіден, бізде қылмыстық процесс мемлекет үшін өте қымбат. Айта кетсек, ол жерде тергеушілер, прокурорлар, соттар, мыңдаған сараптамалар қамтылған. Сонымен қатар, атқару мерзімі тым ұзақ, қиын да күрделі. Елбасы осыған үнемдеу тұрғысынан қарап, бірақ үнемдеймін деп артық кетпеңдер, адамның құқығы бұзылмасын деп ескертті. Үшіншіден, бұл заң жобасымен құқық қорғау органдарын күшейтпейміз. Оларға ешбір жаңа билік пен құзірет бермейміз, керісінше мойнымызға міндет аламыз әрі жауапкершілігімізді арттырамыз», — деді Асанов.
