2017 жылы 7 қарашада Пирамида ғимаратындағы «Ұлттық мәдени салт-дәстүрлер» залында Жезқазған тарихи-археологиялық музейі мен Қ.И.Сәтбаев атындағы тарихи-өндірістік музейі ұйымдастырылған «Кетбұқа және өлке тарихи» атты көрмесінің ашылуы өтті. Салтанатты шара қонақтарды әсем күй «Сарыарқаны» әуенінде дәстүрлі шашумен қарсы алудан басталды.
Елбасы алға қойған «Болашаққа бағдар: рухани жаңғыру» бағдарламалық мақаласы аясында тарихи тұлғаларымызды танып-біліп, есімдерін жаңғыртудың маңызы айрықша.
Келесі күні, яғни, 8 қарашада ел болып атқарған елеулі істің арқасында қаланың көрікті бақжолының бас жағынан тарихи тұлғаның ат үстіндегі қоладан құйылған еңселі ескерткішінің ашылуы өтпекші. Қала әкімдігінің, «Кетбұқа» қорының қолдауымен өткелі отырған ескерткіштің ашылу салтанатына арнайы келген Астанадан, Алматыдан ғалымдар, тарихшылар, белгілі қаламгерлер, ақындар, министрлік өкілдері және қоғам қайраткерлері де көрменің ашылуының құрметті қонақтары болды. Ақын, ҚР Журналистер Одағының мүшесі – Ізтөлеу Түсіпов «Кетбұқадай ер қайда?» арнауын оқыды.
Көненің көзіндей, өткеннің өзіндей болған жәдігерлерді жинақтап, оларды келешекке көздерінің қарашығындай сақтап, жеткізген – бұл музей ошағы. Қатысушылар назарына Жезқазған тарихи-археологиялық музейінің қызметкерлері музей қорындағы құнды жәдігерлерді, 19-20 ғ.ғ. қазақ халқының ұлттық киімдерін ұсынды.
«Кетбұқа және өлке тарихы» көрмесінің ашылуының алғы сөзі Жезқазған қаласы Мәдениет және тілдерді дамыту бөлімінің басшысы Салтанат Сүлейменқызына берілді.
№13 мектебінің жанынан құрылған «Музей достары» клубының жетекшісі музейтанушы, педагог Ғайни Жолбарысқызы шараға тәрбиеленушілермен келді. Оқушылар өлеңдер оқыды.
Республикалық «Серпін» жастар сыйлығының иегері Сапар Қасенұлы осы іс-шараға Талдықорған қаласынан арнайы атбасын, бұрып, келіпті. Алыстан ат арылтып келген қонақ «Күй пірі» толғауын орындады.
Көрменің лента қию рәсімін «Қазақтың Кетбұқасы» қоғамдық бірлестігінің төрағасы Төлеген Бүкіров жасады.
Қ.И.Сәтбаев атындағы тарихи-өндірістік музейінің басшысы, өлкетанушы Балкенов қонақтарға «Кетбұқа және өлке тарихы» атты көрмені таныстырды.
Гүлжан Нұрланқызы
