Қыс мезгілінде қауіп тек қана адамға емес, үй жануарларына келуі мүмкін. Бұған дәлел ретінде жуырда Түркістан қаласы Ескі Иқан елді мекенінде орын алған оқиғаны келтіруге болады. Ескі Иқан елді мекенінде мал шаруашылығымен айналысатын тұрғыннан Түркістан қаласы әкімшілігіне хабар келіп түскен болатын. Иқан өзенінің сулары жағалаудан шығып, жайылымдағы 2 мал қора суда қалып кететіндігі жергілікті тұрғынды қатты алаңдатты. Ал, қорадағы ірі және ұсақ мал аралас –ге жуық малдың судың ортасындағы жайылымда қалғаны оның мазасын алды. Түркістан қаласы Ескі Иқан елді мекеніне Оңтүстік Қазақстан облысы Төтенше жағдайлар департаментінің төтенше жағдайларды алдын алу бөлімінің бастығы шұғыл түрде шығып кетті. Оқиға орнына Түркістан қаласының әкімі, оның орынбасары және «Қазсушар» РМК мамандары да жетті. Жедел түрде Арыс-Түркістан каналынан Иқан өзеніне су жіберуді тоқтату туралы «Қазсушар» мекемесінің мамандарына тапсырма берілді. Келесі күні таңертен су деңгейі төмендеді, ал судың ортасында қалған жайылымдағы 200 жуық мал айдап шығарылды. Бұл оқиғаның орын алу себебі жаз айларынан басталады. Ескі Иқан елді мекеннің тұрғындары Иқан өзенінде өз еркімен қолдан дамба жасаған екен. Өзеннің екі жағалауынан және өзеннің ортасынан дамба құрып, су жинайтын орын жасаған. Суды күнделіктегі тұрмыстағы қажеттілігі үшін пайдаланған болатын. Қыс өз жамылғысымен жетіп келді, ал адамдардың немқұрайлығы келенсіз жағдайға алып келе жаздады. Осындай оқиғаларды алдын алу үшін ТЖД-нің басшылығы қалалар мен аудандардың әкімшілігіне су басу қауіпті учаскелерді зерттеп шығу туралы тапсырма берді. Ал,Түркістан қаласының билік органдары да рұқсатсыз салынған дамбаны жедел түрде бұзу туралы тапсырма алды.
