ҚРАқпарат және коммуникациялар министрі Дәурен Абаев есеп беру кездесуі кезінде еліміздегі орталықтан шалғайда орналасқан ауылдардың қашан интернетпен қамтамасыз етілетінін айтты, деп хабарлайды BAQ.kz тілшісі.
Елбасы Жолдауында да бұл мәселе жан жақты қамтылған. Ал бүгін ел алдында есеп берген министр алдағы үш жылдың ішінде бұл шаруа біржақты болатынын айтты.
«Иә,бұл да өте өзекті мәселе. Министрлік құрылғанда Елбасы айтқан міндеттердің бірі де осы коммуникациялық инфрақұрылымды жақсарту болатын. Биылғы Жолдауында да оптикалық-талшықты инфрақұрылыммен жаппай қамтуды атап тапсырды. Жалпы, цифрлы индустрияны құру үшін, ең бірінші, халықты интернетпен қамтамасыз ету қажет екені анық» — дейді министр.
Сонымен қатар, Абаев егер жұмыс дұрыс жүрсе, қанша ауыл қамтамасыз етілетінін де жеткізді.
«Әрине,қазір ауылдардың көпшілігінде интернет байланысы бар. Бірақ, оның сапасы сын көтермейтінін жақсы білеміз. Сондықтан қазір «Ауылдық елді мекендерде талшықты-оптикалық байланыс желілерін құру» жобасын жүзеге асыруға бар күшімізді салып жатырмыз. Осы жоба сәтті жүріп кетсе, алдағы үш жылда 1900 ауылға желі тартылып, 5 миллионға жуық адам сапалы интернетке қол жеткізеді», — дейді Дәурен Абаев.
Сонымен қатар министр халықты «100 жаңа есім» жобасына қатысуға шақырды.
Дереккөз: Baq.kz