Оңтүстік Қазақстан облысының Түлкібас ауданында екі депутат төбелесіп, оның ақыры екеуінің де ауруханаға түсуімен аяқталды. Сенімді ақпарат көздерінен алынған мәліметтерге қарағанда оқиға кеше болған. Депутаттың бірі түскі уақытта, екіншісі түнде аудандық ауруханаға жеткізілген. Екеуі де аудандық мәслихаттың депутаттары. Олардың аты-жөндері де белгілі болды-Өтепбай Мәткәрімов пен Айтбек Меңлібеков. Халық қалаулыларының біріне дәрігерлер миы шайқалған деген диагноз қойған көрінеді. Екіншісі ауруханаға жүрек ұстамасынан түскенге ұқсайды. Өтепбай Мәткәрімов уақтысында аудан әкімінің орынбасары қызметін атқарған. Екі депутаттың не себепті төбелескені әзірге белгісіз. Дегенмен халық аманатын арқалаған қалаулылардың осындай келеңсіз әрекетке барғаны қайбір абырой дейсіз?! Қазір осы оқиға бойынша тиісті орындар тексеру амалдарын жүргізіп жатқан көрінеді.
www. Oinet.kz
