Көктемнің алғашқы мерекесі 8 — Наурыз ананың аялы алақанындай жүректерге жылулық ұялатады. Адамзаттың нәзік жандарына арналған мереке табиғаттың оянып, тіршіліктің түрлену кезеңінен бастау алады. Осы орайда айтулы мерекеге орай бүгін облыс әкімі Жансейіт Түймебаевтың бастамасымен Шымкент қаласындағы «Шымтөбе» тарихи алаңы маңындағы скверге бірнеше түп сәндік ағаш көшеттері отырғызылды. Ал айтулы шараға қала әкімі мен әкімдікке қарасты дербес бөлім басшылары және де бір топ ардагерлер қауымы қатысып, аймақ басшысымен бірге бұл орынға жаңа көшеттер екті. Осы ретте миллионға тарта тұрғыны бар шаһарымыздың кезінде жасыл желекті қала болғандығын тілге тиек еткен Жансейіт Түймебаев барша азаматты қаланы көріктендіруге, көшет егуге шақырды.
«Шымкенттің 70 пайызын жеке меншіктегі тұрғын үйлер құрайды. Әрбір тұрғын ауласына кем дегенде бір ағаштан отырғызатын болса қаламыз айтарлықтай түрлене түсер еді. Сондықтан, әр қайсыңыздың қаланың жасыл желекке айналуына үлес қосуларыңызды сұраймын және бірлесе жұмыс істеуге шақырамын»,- деді Жансейіт Қансейітұлы.
Бұл күні скверге отырғызылған сәндік көшеттер барша нәзік жандылардың мерекесіне арналды. Себебі Ана – тіршіліктің қайнар көзі, махаббаттың шуақ күні, мейірімнің кәусар бұлағы. Осы орайда облыс басшысы игі шара барысында мерекелік құттықтауын да білдіріп өтті.
Бұл күні облыс басшысымен бірге Шымкент қаласының ең биік нүктелерінің бірі болып табылатын «Шымтөбе» тарихи алаңы маңындағы скверге ағаш көшеттерін отырғызған ардагерлердің де әкімге айтар алғыстары зор. Себебі, бірінші кезекте қаланың тазалығы мен көгалданып көріктенуіне үлес қосып бастамашы болып жүрген Жансейіт Қансейітұлының бұл саладағы еңбегін қариялар қауымы жоғары бағалап отыр.
Осылайша, Халықаралық әйелдер күні мерекесіне орай «Шымтөбе» сквері бірнеше сәндік көшеттермен толықса, қала әкімдігінің өкілдері алдағы уақытта да саялы демалыс орындарын көгалдандыру жұмыстары жалғасын табатындығын айтып тарқасты.
Абай Омар
