Оңтүстік Қазақстан облысы қысқы жылыту маусымына сақадай сай. Яғни өңір бойынша 3256 бюджеттік мекемелердің жылу жүйелері толық дайындалып, олар қажетті қатты және сұйық отынмен қамтамасыз етілген. Сондай-ақ, облыс бойынша орталықтандырылған жылумен қамтамасыз етілетін көпқабатты тұрғын үйлердің 99 пайызы жауапты маусымға дайын тұрған жайы бар. Бұл туралы бүгін облыс әкімдігінде өткен баспасөз жиынында ОҚО тұрғын-үй коммуналдық шаруашылық және жолаушылар көлігі басқармасы басшысының орынбасары Батырша Маханов мәлім етті. Облыстың биылғы жылыту маусымына дайындығы баяндалған баспасөз жиынына бұл күні тұрғын- үй коммуналдық шаруашылық және жолаушылар көлігі басқармасы басшысының орынбасары Батырша Маханов, «Энергоорталық-3» АҚ бас директорының орынбасары Сайлаубай Жақыпов және Шымкент қалалық тұрғын-үй коммуналдық шаруашылық бөлімінің басшысы Мәлік Әбдінұровтар қатысты. Басқосуда алғаш болып мәлімдеме жасаған Батырша Таштайұлы облыстағы 3 мың 200-ден астам бюджеттік мекемелердің жүз пайыз қыс маусымына дайын тұрғандығын жеткізді. Ол үшін аталмыш мекемелер өздеріне қажетті 168 мың тоннадан астам қатты отын және 1 млн. 441 мың литр сұйық отынмен толықтай қамтамасыз етілген. Ал өңір бойынша орталықтандырылған жылумен қамтамасыз етілетін 2247 көпқабатты тұрғын үйлердің бүгінгі күнге 2240-ы яғни 99 пайызы әзірленіп үлгерген. Ал қалған жеті үйдің дайындық жұмыстары 26 қазанға дейін толық аяқталады деп жоспарланып отыр. Мұнан өзге, Шымкент қаласындағы қазылып құбырлары ауысқан көшелерді қалпына келтіру жұмыстары 10 қарашаға дейін аяқталады деген жылуға жауапты мамандар биыл қыста облыс тұрғындарын тоңдырмаймыз деп сендіреді.
Абай ОМАР
