Шымкентте отбасы құндылықтарын дәріптеп, өнегелі әулеттердің тағылымды тәжірибесін көпшілікке үлгі ететін «Мерейлі отбасы – 2026» ұлттық байқауының қалалық кезеңі қорытындыланды. Дәстүрлі байқау биыл да шаңырақтың беріктігі мен ұрпақ тәрбиесіне айрықша мән беріп, еңбегімен елге үлгі болып жүрген отбасыларды бір ортаға тоғыстырды.
«Көрме» орталығында өткен салтанатты марапаттау рәсімінде қаланың бес ауданынан іріктелген 12 отбасыға құрмет көрсетілді. Жеңімпаздар мен жүлдегерлерді қала әкімінің орынбасары Сәрсен Құранбек құттықтап, оларға арнайы марапаттарды табыс етті.
Биылғы байқауға Шымкенттің бес ауданынан 48 отбасы өтінім берген. Екі айға жуық уақытқа созылған іріктеу кезеңінде қатысушылардың отбасылық дәстүрі мен бала тәрбиесіне деген жауапкершілігі ғана емес, олардың білім, ғылым, мәдениет, спорт, кәсіпкерлік, қоғамдық қызмет және басқа да салалардағы жетістіктері назарға алынды. Бұл – байқаудың басты ерекшеліктерінің бірі. Өйткені «Мерейлі отбасы» атауы тек отбасы мүшелерінің жеке жетістігін емес, олардың қоғамның дамуына қосқан үлесін де бағалауды көздейді.
Отбасы – мемлекеттің ең маңызды әлеуметтік институттарының бірі. Берік шаңырақта қалыптасқан тәрбие баланың болашағына ғана емес, тұтас қоғамның ахуалына әсер етеді. Осы тұрғыдан алғанда, өнегелі отбасылардың өмір жолын насихаттау – ұлттық құндылықтарды дәріптеудің, жас ұрпаққа дұрыс бағыт-бағдар берудің маңызды тетігі.
Мемлекет басшысы Қасым-Жомарт Тоқаев өз сөздерінде отбасы институтын нығайту, бала тәрбиесіне жауапкершілікті арттыру, жастарға дұрыс тәрбие мен сапалы білім беру мәселелеріне айрықша мән беріп келеді. Президенттің қоғамның дамуы адам капиталына, ал адам капиталы ең алдымен отбасындағы тәрбие мен білімге байланысты деген ұстанымы «Мерейлі отбасы» байқауының негізгі идеясымен сабақтас.
Мемлекет басшысы атап көрсеткендей, елдің болашағы – білімді, еңбекқор әрі отансүйгіш ұрпақтың қолында. Ал мұндай қасиеттердің негізі отбасында қаланады. Сондықтан балаға білім берумен қатар, оған үлкенді сыйлау, кішіге қамқор болу, адал еңбек ету, елге қызмет ету сияқты құндылықтарды сіңіру – әр шаңырақтың маңызды міндеті.
Биылғы қалалық кезеңнің бас жүлдесі Абай ауданынан қатысқан Қожамжаровтар әулетіне бұйырды. Өнегелі отбасы 1 млн теңге көлеміндегі сертификатпен марапатталды.
Сейдахмет Қожамжаров пен жұбайы Зылиха Пернебекова – ғибратты ғұмырын ұрпақ тәрбиесіне арнаған жандар. Әулет басшысы ұзақ жылдар бойы педагог болып еңбек етіп, талай шәкірттің білім алуына үлес қосқан. Жұбайы екеуі 10 бала тәрбиелеп өсіріп, барлығына жоғары білім алуына жағдай жасаған.
Бүгінде Қожамжаровтар әулетінің бірнеше буыны қоғамның түрлі салаларында жемісті еңбек етіп келеді. Олардың қатарында білім беру, ғылым, медицина, психология, өнер, спорт, әскери және қоғамдық қызмет салаларының мамандары бар. Әулет құрамында бір академик, екі профессор және алты ғылым магистрінің болуы – отбасыдағы білім мен ізденіске деген көзқарастың нәтижесі.
Бұл әулеттің жетістігі – бір ғана отбасының табысы емес, кейінгі ұрпаққа берілген дұрыс тәрбиенің нақты көрінісі. Ата-ананың еңбегі мен өнегесі балаларының кәсіби таңдауынан, қоғамдық белсенділігінен және елге қызмет етуге деген ұмтылысынан жалғасын тапқан.
«Отбасының берекесі – бүкіл Шымкенттің берекесі. Балаларымыз бен немерелеріміз ғылым, медицина, спорт және өнер салаларында жетістіктерге жетіп келеді. Біз үшін үлкенге құрмет, еңбекке жауапкершілік және отбасы мүшелеріне деген өзара қолдау басты құндылық», – дейді Сейдахмет Қожамжаров.
Оның айтуынша, ұрпақ тәрбиесінде ата-ананың жеке үлгісі ерекше рөл атқарады. Баланы жақсы сөзбен тәрбиелеу жеткіліксіз, оған ең алдымен еңбегімен, адамгершілігімен, өзара сыйластығымен үлгі болу қажет. Қожамжаровтар шаңырағының өмірлік ұстанымы да осыған негізделген.
Жалпы, биылғы байқаудың жүлде қоры 2,9 млн теңгені құрады. Жүлдеге ие болған отбасылардың әрқайсысының өзіндік өнегесі мен өмірлік тәжірибесі бар. Бірі – көпбалалы отбасымен, енді бірі – білім мен ғылымдағы жетістігімен, үшіншісі – қоғамдық белсенділігімен ерекшеленеді.
Олардың ортақ қасиеті – отбасылық құндылықтарды сақтай отырып, қоғам игілігіне қызмет етуі.
«Мерейлі отбасы» байқауының мәні де осында. Бұл – үздік отбасын анықтайтын ғана емес, қоғамға үлгі болатын шаңырақтардың тәжірибесін насихаттайтын әлеуметтік жоба. Себебі бүгінгі таңда отбасының беріктігі, ата-ананың жауапкершілігі, бала тәрбиесі мен ұрпақтар сабақтастығы аса өзекті мәселелердің біріне айналып отыр.
Шымкент секілді миллионнан астам тұрғыны бар ірі шаһарда бұл бастаманың маңызы тіпті жоғары. Қаланың әлеуметтік-экономикалық дамуы жаңа нысандар мен өндірістердің көбеюімен ғана өлшенбейді. Оның басты көрсеткіші – осында өмір сүріп жатқан адамдардың әл-ауқаты, балалардың тәрбиесі мен білімі, қоғамдағы өзара сыйластық пен жауапкершілік.
Сондықтан өнегелі шаңырақтарды дәріптеу – ұлттық тәрбиені жаңғыртудың бір жолы. Берік отбасы – тәрбиелі ұрпақтың, тәрбиелі ұрпақ – қуатты мемлекеттің негізі. Ал Қожамжаровтар секілді әулеттердің өмір жолы осы қарапайым, бірақ маңызы зор ақиқатты айқын көрсетеді.
«Мерейлі отбасы – 2026» байқауының қалалық кезеңі осылайша отбасылық құндылықтарды ұлықтап қана қоймай, қоғамға маңызды ой салды. Өнегелі шаңырақтың мерейі – оның материалдық жағдайымен емес, ұрпағының тәрбиесімен, елге қосқан үлесімен және бір-біріне деген құрметімен өлшенетінін тағы бір мәрте дәлелдеді.
