ҚОНЫС АУДАРУШЫЛАРҒА 7 МИЛЛИОН ТЕҢГЕГЕ ДЕЙІНГІ ҚОЛДАУ

Елімізде кадр тапшылығы бар өңірлерге қоныс аударатын азаматтарды қолдау тетіктері кеңейтілді. Енді экономикалық ұтқырлық сертификатының ең жоғары мөлшері 7 миллион теңгеге дейін ұлғайтылып, бұл қаражат тұрғын үй сатып алуға бағытталады. Аталған қаржы қандай тәртіппен және қанша уақыт ішінде беріледі? Ал оңтүстіктен солтүстік өңірлерге қоныс аударған азаматтар қайта көшіп кетсе, оларға қандай талаптар мен жауапкершілік жүктеледі?

Елімізде еңбек күші жетіспейтін өңірлерге қоныс аудару бағдарламасы жаңартылып, азаматтарға көрсетілетін мемлекеттік қолдау көлемі артты. Экономикалық ұтқырлық сертификатының ең жоғары мөлшері енді 7 миллион теңгеге дейін жетіп, оны тұрғын үй сатып алуға пайдалануға болады. Сонымен қатар қоныс аударушыларға жалға берілетін баспана шығындары мен коммуналдық төлемдерге субсидия қарастырылған. Бағдарлама аясында азаматтарға жаңа өңірде жұмысқа орналасу бойынша да жан-жақты қолдау көрсетіледі. Бұл туралы еңбекші ауданы мансап орталығының басшысы айтты.

Бүгінде Солтүстік Қазақстан, Қостанай, Павлодар, Қарағанды, Ұлытау, Абай және Шығыс Қазақстан облыстарына қоныс аударуға мүмкіндік беріліп отыр. Бұл өңірлерде әсіресе білім беру, денсаулық сақтау, ауыл шаруашылығы, құрылыс және жұмысшы мамандықтарына сұраныс жоғары. Бағдарламаға қатысушылар тұрғын үй алу мүмкіндігімен қатар, тұрақты жұмыспен қамтылып, жаңа ортаға бейімделу бойынша қажетті қолдауға ие болады. Осы жұмыстарды үйлестіруде Мансап орталықтары азаматтарға бос жұмыс орындарын ұсынып, құжат рәсімдеу мен жұмыс берушілермен байланыс орнатуға көмектеседі.  Мемлекеттік қолдау еңбек күші тапшы өңірлердің кадрлық әлеуетін арттырып, азаматтардың тұрмыс сапасын жақсартуға ықпал етеді.