МЕГАПОЛИСТІҢ ЖЫЛУ МАУСЫМЫНА ДАЙЫНДЫҒЫ

Шымкентте жылыту маусымына дайындық жұмыстары қарқынды жүргізілуде. Қаладағы 2 241 көпқабатты тұрғын үйдің 95 пайызы жылыту маусымына дайын. Қазір шаһардағы қоймаларда 10 мың тоннадан астам көмір қоры жинақталған. Жылыту маусымына дайындық аясындағы қалған жұмыстарды 15 қыркүйекке дейін толық аяқтау жоспарланып отыр.

Биыл Шымкенттегі жылу желілерін ағымдағы жөндеуге 1 миллиард 526 миллион теңге қарастырылған. Жоспар бойынша жалпы 18,5 шақырым жылу құбыры жөнделеді. Қазіргі таңда 16,1 шақырым құбыр демонтаждалып, оның 9,9 шақырымы қайта монтаждалды. Жөндеу жұмыстарын 15 қыркүйекке дейін толық аяқтау жоспарланып отыр. Жылу желілерінің жағдайын бақылау үшін биыл қалада құбырішілік диагностика жұмыстары жүргізілген. Бұл туралы баспасөз жиында мәлімдеді. НАрнайы технологияның көмегімен магистральдық желілердің 5 шақырымнан астам бөлігі тексеріліп, жұмыстар толық аяқталды. Сонымен қатар, жылу желілеріндегі ақауларды ерте анықтауға мүмкіндік беретін акустикалық әдісті цифрландыру жұмыстары қолға алынуда. Бұл жүйе апаттардың алдын алып, жөндеу шығындарын азайтуға мүмкіндік береді.

Қаладағы  2 241 көпқабатты тұрғын үйдің 2 134-і, яғни 95 пайызы жылыту маусымына дайын. Бұдан бөлек, 31 дербес қазандықтың 29-ы және 17 сорғы станциясының 15-і әзір. Алдағы жылыту маусымына Шымкент тұрғындары мен бюджеттік мекемелер үшін 22,1 мың тонна көмір қажет болса, қазіргі таңда қоймаларда 10 мың тоннадан астам көмір қоры бар. Қалған нысандарды дайындау жұмыстары белгіленген кестеге сәйкес жалғасуда.

Шымкентте жылыту маусымына дайындық жұмыстарының негізгі бөлігі аяқталуға жақын. Қалған жылу желілерін жөндеу, анықталған ақауларды жою және жылу энергетикасы нысандарын толық әзірлікке келтіру жұмыстары тұрақты бақылауда. Мамандар жылыту маусымы басталғанға дейін барлық нысанды 100 пайыз дайындық деңгейіне жеткізуді жоспарлап отыр.