Жолдағы қауіпсіздік пен техниканың сақадай сай болуы – кез келген тапсырманы мінсіз орындаудың басты кепілі. Осы мақсатта Шымкент гарнизонында автокөліктердің техникалық жай-күйіне кезекті тексеру жүргізілді. Рейд барысында көлік тұрақтарының жағдайы, жүргізушілердің құжаттары мен техникаларды пайдалану талаптарының сақталуы бақылауға алынды.
Тексеруге жеке құрамды тасымалдауға арналған барлық көлік қамтылды. Мамандар қозғалтқыштан бастап жарық беру жүйесіне дейінгі техникалық жарамдылығын, көліктердің сыртқы жай-күйін, қажетті құрал-жабдықтарының толықтығын тексерді. Сонымен қатар жүргізушілердің әскери билеті мен арнайы көлікті басқаруға рұқсат беретін куәліктері қаралды. Жауапты мамандарға техниканы пайдалану тәртібіне қатысты талаптар тағы бір мәрте түсіндірілді.
Мұндай бақылау шаралары гарнизонда тұрақты өткізіліп тұрады. Оның нәтижесінде көлік құралдарының техникалық дайындығы, пайдалану қауіпсіздігі және кез келген қызметтік міндетті орындауға әзірлігі бағаланады. Тексеру қорытындысы бойынша барлық техника белгіленген талаптарға сәйкес деп танылды.
