ӘЛЕУМЕТТІК ЖЕЛІНІҢ ЖҰЛДЫЗЫНА АЙНАЛҒАН ОПЕРАТОР

Жылдамдықпен жүйткіген спортшыларды түсіремін деп, мәреге олардан бұрын жеткен видеооператор бүгінде әлеуметтік желінің жұлдызына айналды. Желі қолданушылары оны «желаяқ оператор» деп атап, кәсіби шеберлігіне тәнті болуда. Әдемі кадр үшін ештеңеден тайынбайтын Шымкент қаласы Спорт басқармасының қызметкері Ыбырай Кенжетайұлы әр жарыстың шынайы көрінісін көрерменге дәл сол сәттегідей жеткізуге тырысады. Өз ісіне шынайы махаббатпен қарайтын маманмен тілшіміз эксклюзив сұхбат жүргізіп қайтты.

Кез келген спорттық жарыста көрермен назарына алдымен спортшылар ілінгенімен, әсерлі кадрдың артында оператордың тынымсыз еңбегі жатады. Ыбырай Кенжетайұлы да дәл сондай кәсіби мамандардың бірі. Жүгіру жарысы кезінде спортшылардың қарқынына ілесіп, кейде олардан бұрын мәреге жететін сәттері әлеуметтік желіде кеңінен тарады. Сол бейнелердің арқасында ол көпшілікке «желаяқ оператор» ретінде танылды. Ал өзі мұның барлығы көрерменге сапалы кадр ұсыну жолындағы күнделікті еңбектің нәтижесі екенін айтады.

Кәсіби маманның айтуынша, жақсы кадр кездейсоқ түсірілмейді, оның артында үлкен дайындық, тәжірибе және жауапкершілік тұрады. Әр жарыстың ерекшелігіне қарай түсірілім бағытын алдын ала жоспарлап, спортшылардың қозғалысын дәл болжауға тырысады. Кейде ең әсерлі сәтті түсіру үшін жүздеген метрге тоқтаусыз жүгіріп шығуға тура келеді. Осындай табандылықтың арқасында оның түсірген бейнелері көрерменнің жоғары бағасына ие болып жүр. Бүгінде Ыбырай Кенжетайұлы әлеуметтік желідегі танымалдылығынан бұрын, өз ісіне деген адалдығын ең үлкен жетістік санайды.