Елімізде 1 шілдеден бастап бірқатар заңнамалық өзгерістер күшіне енеді. Соның ішінде мемлекеттік қызмет жүйесіне қатысты жаңа талаптар мен жаңашылдықтар бар. Осыған орай Шымкентте Конституцияның заң үстемдігі мен тиімді мемлекеттік басқарудағы рөлі талқыланды. 
Іс-шараға Әділет департаментінің қызметкерлері, Мемлекеттік басқару академиясының тыңдаушылары, жоғары оқу орындарының өкілдері, мен жастар ұйымдарының жетекшілері қатысты. Дөңгелек үстелде Конституцияның мемлекеттік қызмет жүйесіндегі рөлі, заңнамалық өзгерістердің маңызы және мемлекеттік басқарудағы конституциялық қағидаттарды іске асыру мәселелері талқыланды. Сондай-ақ отбасы институтын нығайту мен жастардың қоғамдық өмірге қатысуы сөз болды.
Жиын барысында Мемлекеттік басқару академиясының Шымкент қаласы бойынша филиалының директоры Қанат Қадырбеков конституциялық қағидаттар мен заңнамалық өзгерістерді мемлекеттік басқару жүйесінде тиімді іске асырудың маңызын атап өтті.
Іс-шара соңында Мемлекеттік қызметшілер күніне орай бірқатар сала маманы марапатталды. Жиын қорытындысында қатысушылар Конституцияның заң үстемдігін қамтамасыз етудегі, тиімді мемлекеттік басқаруды қалыптастырудағы және азаматтық қоғамды дамытудағы рөліне ерекше тоқталды.
