Шымкентте 7 мамыр – Отан қорғаушылар күніне арналған салтанатты іс-шара өтті. Астана алаңында ұйымдастырылған мерекелік жиынға әскери қызметшілер, Қарулы Күштердің ардагерлері, құқық қорғау органдарының өкілдері, қоғам белсенділері, жастар мен қала тұрғындары қатысты. Салтанатты шараға Шымкент қаласының әкімі Ғабит Сыздықбеков қатысты. Рәсім Шымкент гарнизонының жеке құрамының сап түзеуінен басталып, Қазақстан Республикасының Мемлекеттік Туы алаңға енгізілді. Одан кейін Мемлекеттік Әнұран орындалды. Мерекелік бағдарлама аясында гарнизон бөлімшелерінің қатысуымен әскери шеру ұйымдастырылды. Әскери қызметшілер саптық даярлықтың жоғары деңгейін көрсетіп, тәртіп пен жауынгерлік рухтың үлгісін паш етті. Қала тұрғындары сарбаздардың үйлесімді қимылы мен әскери машығын тамашалады.
Сонымен қатар, С.Рахымов атындағы әскери колледждің курсанттары қоян-қолтық ұрыс элементтері мен арнайы тактикалық көріністер ұсынды. Курсанттардың шеберлігі мен дайындық деңгейі көпшілік назарын аударды. Іс-шара барысында әскери қызметтің маңызы мен ел қауіпсіздігін қамтамасыз етудегі сарбаздардың рөлі кеңінен көрініс тапты. Мерекелік жиын жастардың бойында патриоттық рухты қалыптастыруға және Отан қорғаушыларға деген құрметті арттыруға бағытталды. Кеш соңы концерттік бағдарламаға ұласты. Қала өнерпаздары мен шығармашылық ұжымдары патриоттық әндер орындап, көрермендерге мерекелік көңіл-күй сыйлады. Сахнада Отан, ерлік және ел бірлігі тақырыбындағы әндер шырқалды. Осылайша, Шымкентте өткен Отан қорғаушылар күніне арналған мерекелік іс-шара ел қорғаған азаматтарға көрсетілген құрметтің айқын көрінісіне айналды.
