Балалар мен жасөспірімдердің бос уақытын тиімді өткізу, бұқаралық спортты дамыту – бүгінгі қоғамның басты міндеттерінің бірі. Осы мақсатта “Милан” балалар футбол клубы екінші жыл қатарынан жасөспірімдер арасында ауқымды футбол турнирін ұйымдастырып келеді. Мегаполистегі бұл спорттық дода жас буынның футболға деген қызығушылығын арттырып қана қоймай, олардың болашағына бағыт-бағдар беретін маңызды алаң.
Балалар мен жасөспірімдер арасындағы футболдан дәстүрлі турнир биыл да жоғары деңгейде өтті. Оған 800-ге жуық жас спортшы, 58 команда қатысып, өзара бақ сынады. Бұл – тек жарыс қана емес, болашақ чемпиондарға жол ашатын үлкен спорт мектебі. Суперлиганың қорытынды шарасы Мемлекеттік Әнұранмен басталды. Жас футболшылар Әнұранды шырқап, отансүйгіштік рухты тағы бір дәлелдеді.
Турнирді ұйымдастырып отырған “Милан” балалар футбол клубы. 2022 жылы негізі қаланған команда жас буынның салауатты өмір салтын ұстануына, спортқа деген қызығушылығын арттыруға ерекше көңіл бөледі. Жас футболшылардың арманын оятып, жеңіске деген жігерін күшейту үшін Суперлиганың жабылу салтанатына Қазақстан ұлттық құрамасында ойнаған танымал футболшылар арнайы шақырылды. Олар жас спортшыларды құттықтап, алдағы мақсаттарына нық қадам басуға шақырды.
Жарыс соңында қатысушылар тек жүлделі орындармен ғана емес, арнайы номинациялармен де марапатталды. Атап айтқанда “Үздік қақпашы”, “Үздік қорғаушы”, “Үздік шабуылшы”, “Үздік ойыншы” аталымдары бойынша үздіктер анықталды.
Бұл жарыс – бұқаралық спортты дамытудың нақты көрінісі. Шымкент қаласы білім басқармасының тарапынан мұндай жобалар қолдау тауып отыр. Нәтижесінде мектеп жасындағы балалар бос уақытын мазмұнды өткізуге мүмкіндік алады.
Ұйымдастырушылардың айтуынша, мұндай турнирлер алдағы жылдары да дәстүрлі түрде жалғасын табады. Өйткені бұл – жасөспірімдердің спортқа деген қызығушылығын арттырып, болашақта ел намысын қорғайтын мықты футболшыларды тәрбиелеудің алғашқы баспалдағы.
