Шымкент қаласының әкімі Ғ.Сыздықбеков бұқаралық ақпарат құралдары қызметкерлерін кәсіби мерекесімен құттықтады. Жақында ғана ел игілігіне берілген «Көл» демалыс аймағында мерекелік іс-шара ұйымдастырылып, шаһар басшысы қоғамға шынайы, нақты ақпарат таратушы журналистердің еңбегі ерекше екенін атап өтті.
Мегаполисте бүгінгі таңда 170-тен аса БАҚ жұмыс істейді. Олардың 123-і мерзімді басылымдар, 4 телеарна, 1 радио және 47 интернет ресурстары. Билік пен қоғамның арасында алтын көпір бола білген ақпарат қызметкерлерінің еңбегін елемей өтуге болмас. Осыны ескерген шаһар басшысы қаладағы ақпарат саласының мамандарын кәсіби мерекемет құттықтап, құрмет көрсетті. Қала әкімі өз сөзінде мегаполистегі «Спутник» аллеясын журналистер аллеясы деп өзгертуге ниет білдірген тұрғындардың ұсынысын толық қолдайтынын жеткізді.
Атаулы мерекеде бірқатар БАҚ өкілдеріне қала әкімінің алғыс хаты табысталды. Оның ішінде оңтүстіктен, еліміздің әр облысынан, қала берді шет елдерден хабар тарататын “Айғақ” телеарнасының редакторы Бағлан Байкөбекқызының еңбегі жоғары бағаланды.
Іс-шараға телевизия саласына ерен еңбегі сіңген бірқатар ақпарат саласының ардагерлері де қатысты. Соның бірі «Айғақ» телеарнасының телеоператоры Ағабек Қазанбай! Телевизия саласында 50 жылға жуық уақыт қызмет етіп, жақында ғана Мемлекет басшысының жарлығымен «Құрмет» орденінің иегері атанды. Ордабасы ауданының құрметті азаматы қазіргі уақытқа дейін 40-тан астам шәкірт тәрбиелеп үлгерген.
Айта кетейік, ерекше форматта ұйымдастырылған мерекелік іс-шара соңы концерттік бағдарламамен жалғасты. Онда елімізге танымал эстрада жұлдыздары өнер көрсетті.
