Қазір алаяқтарға алданғандардың қарасы көбейіп келеді. Соның ішінде, ғаламтор арқылы жасалатын қылмыстар белең алып барады. Азаматтар алаяқтардан қайтсе сақтана алады? Бұл мәселенің шешімі бар ма? Осы және өзге де сұрақтарға “интернет- алаяқтықтың профилактикасы және қарсы іс-қимыл туралы” семинарында құзырлы органдар жауап берді. Шараның мақсаты — халықты егжей-тегжейлі ақпараттандыру және цифрлық сауаттылықты арттыру дейді ұйымдастырушылар. 
Цифрландыру басқармасының ұйымдастырумен “Жастар арасында интернет алаяқтықтың алдын алу бойынша” семинары өтті. Шараға полиция департаментінің арнайы өкілдері, ЖОО, Жастармен жұмыс жасайтын комитет төрағалары, жастар ресурстық орталығы коммуналдық мемлекеттік мекемесінің басшылық құрамы қатысты. Жиын барысында цифрландыру басқармасының басшысы Мұхит Кемелов: бүгінде халықтың көбі, әсіресе оң-солын танып үлгермеген жастар ғаламторға жіпсіз байланғанының кесірінен алаяқтардың сол ауылды торуылдайтынын айтты.
Қазіргі таңда ғаламтордағы алаяқтықтың түрлері күн өткен сайын артып келеді. Желінің арғы жағында отырған алаяқ: компьютер, смартфон, планшет секілді заманауи құралдардың көмегімен ғаламторға кіріп, онда отырған адамды түрлі айламен құрығына түсіруге тырысады. Ақша бопсалау, мүлкін жымқыру секілді түрлі құқық бұзушылық әрекеттерге барады. Осы орайда құзырлы органдар, қала тұрғындарына бейтаныс адамға банк карталарының деректерімен жеке басын куәландыратын мәліметтерді бермеу керек екенін айтты.
Қылмыскерлер қазіргі таңда азаматтарды алдап, ақшаларын иемденіп келеді. Соның салдарынан 2023 жылдың қорытындысына сәйкес, жалпы келтірілген шығын көлемі 900 миллион теңгеге жеткен.
