Қалада су құбыры жүйелері 60 пайызға, кәріз желілерінің тозығы 74 пайызға жеткен. Олардың деңгейін төмендетіп, әлеуметтік нысандарды жаңғырту бойынша Су ресурстары-Маркетингі кезеңдік жұмыстарды атқаруда. Мекеме 26 жылдан астам уақыттан бері қызмет көрсету нарығында мемлекеттік-жекешелік әріптестік аясында толымды жұмыс істеп келе жатыр. 1 млн-нан астам халықты сапалы ауыз сумен қамтамасыз ету үшін күніне 1 рет 46 критерий бойынша тазартудан өткізеді. «Су ресурстары-Маркетингі» ЖШС-сі тарату желілері арқылы су беру және ағынды суларды бұру қызметтері бойынша 2023 жылдың есебін берді.
Шымкенттің және өңірдегі бірнеше елдімекеннің халқына тіршілік нәрін жеткізуші Су ресурстары-Маркетингі 2009 жылдан бері сумен жабдықтау және су бұру жүйесіне инвестиция тарту үшін Еуропалық қайта құру және даму банкімен ынтымақтасып келеді. Кәміпорынға тартылған инвестиция өндірісті өркендетуге жол ашты. Нәтижесінде табиғаттан алған судың сапасын жақсартып, халыққа беруде заманауи технологияны енгізіп отыр. Тіпті, Орта Азияда баламасы жоқ өндіріс қондырғылары іске қосылған. Саладағы атқарылған жұмыстар бойынша мекеменің бас директоры Анарбек Орман баяндама жасады.
Тозығы жеткен құбырлар – үлкен қауіп әкеледі. Мәселен, 2023 жылы диаметрі мың мм канализация 15 жерден опырылып, салдарынан 80 жеке тұрғын үйді су басқан. Кәсіпорынның негізгі міндеті – тұтынушыларды тәулік бойы таза сумен қамтамасыз ету. Оның сапасы да күнделікті бақылауда. 16 түрлі өндіруден және зарарсыздандырудан кейінгі су санитарлық-экологиялық талаптарға толықтай сәйкес келеді. Ағынды су тазарту қондырғылар кешенін жаңғырту нәтижесінде биогаз қондырғысы орнатылды.
Сумен жабдықтау құны бойынша Шымкент қаласы республикада көш бастап тұр. Яғни, 1 текше метрге 48 тг. Бұл өз кезегінде өзге өңірлермен салыстырғанда өте арзан болып тұр. Сондай-ақ, кәріз жүйесі бойынша да ең төменгі бағаны үшінші мегаполис ұстап тұр.
Кәсіпорын тапқан табысының 42 пайызын ескірген құбырларға жұмсайды екен. Сондай-ақ, тұтынушылармен байланысты цифрландыру бойынша онлайн платформадағы біршама тетік іске қосылған. Ендігі, су есептеуіш құрылғыларды цифрлық желіге қосуды жоспарлап отыр.
Су ресурстары-Маркетингінің есепті кездесуіне табиғи монополияларды реттеу комитетінің Шымкент қаласы бойынша департаментінің басшысы, үй, көше комитеттерінің төрағалары, қоғам белсенділері мен өңірлік комиссия мүшелері қатысты.
Жиын соңында 2024-2026 жылдарға ұзақ мерзімді кезеңге арналған жоспарлар таныстырылды. Мекеме басшысы Анарбек Оңғарұлы жиынға келіп, саладағы мәселерді ортаға салып, істің алға қарай жылжуына үлес қосып жүргендерге алғыс білдірді. Әрбір үйде ауыз судың үздіксіз келіп тұруы үшін мекеме мамандары табанды еңбек ете беретінін айтып, жиынды қорытындылады.
