10 тамыз-Абай күні. Бұл мереке Абай Құнанбайұлының 175 жылдығы тойланған күннен бастап бекітілген. Айтулы датаға орай Шымкент қаласында бірқатар іс-шаралар ұйымдастырылды. Соның бірі қала тұрғындары арасында өткен «Абай әлемі» байқауы. Абай күні бүкіл Алаш үшін ұлт болып ұлықтайтын ұлы мереке. Ақынның туған күнін Шымкенттіктерде ерекша атап өтті. Мегаполистегі шаралар ағартушының ескерткішіне гүл қоюдан басталып, ақынның шығармаларынан үзінді оқу, «Абай — адамзаттың мәңгілік рухы» атты ойшылдың өмірі мен шығармашылығына арналған көрмемен танысу және де «Абай әлемі» байқауымен жалғасты. Шараға Шымкент қаласы мәдениет, тілдерді дамыту және архивтер басқармасының басшысы қатысып қала тұрғындарын Абай күнімен құттықтады. Іс-шараның мақсаты — ақынның шығармашылығын кеңінен насихаттау. Зиялы қауым өкілдері мен ақын-жазушылар, Абайтанушы ғалымдар мен қаламыздың белсенді жастары қатысқан шара рухани жаңғырудың үлгісі болды. Ұйымдастырушылардың айтуынша, «Абай әлемі» байқауы осыдан екі ай бұрын әлеуметтік желіде жарияланған. Қала тұрғындарынан белсенділік өте жоғары болып, 150-ге тарта жаны шығармашылыққа жақын жастар қатысқан. 2 ай ішінде инстаграм желісі арқылы қаралымы көп болған бейнежазба иегерлері екінші кезеңге өтіп, көрермен алдында бақ сынады. Байқауға қатысқан ең жас бүлдіршін 6 жаста, ал халықтың көңілінен орын алған бейнежазба 36 мың қаралым жинаған. Мемлекет басшысы халықты Абай күнімен құттықтай отырып, Хакім Абай — ұлт руханиятын дамытуға өлшеусіз үлес қосқан кемеңгер. Ұлағатты ұрпақ тәрбиелеу ісінде Абай өсиетінің маңызы зор. Адал азамат ұғымы ұлы ақынның «толық адам» тұжырымынан бастау алады деп ақынның шығармашылығына зор баға берді.
By Айғақ медиа
