Бес жыл бұрын қаланың құрамына қосылған Базарқақпа тұрғын алабындағы көшелерге асфальт салынуда. Осы реттегі маңызды мәселе – жолдың сапасы. Инфрақұрылымды дамытуға бөлінген қаржы тиімді жұмсалып жатыр ма, әлде жүрдім-бардым тірлік пе? Мамандар «Сапалы жол – Адалдық алаңы» жобасының аясына топтасып, төселген асфальттен сынама алып, сараптамадан өткізді. 
Жаңадан төселген автокөлік жолдарының сапасы мен қауіпсіздігін тексеру мақсатында шаһардың жолға жауапты басқармасы, «Шымкент – Адалдық алаңы» жобалық кеңсесі және «Жол активтері ұлттық сапа орталығының» мамандары Еңбекші ауданына қарасты елдімекен көшесіне төселген асфальтқа мониторинг жүргізді. Тұрғын алаптың Қараөткел, Балқан, Алай, Кеңгір, атауы жоқ 1,2,3,4 көшелеріне асфальт төсеу жұмысы аяқталған. Кезекті аралау шарасы Сасқұндыз, Қызылата көшесінде болды.
Иә, мамандар жылжымалы зертхананы қолдану арқылы асфальт жолдан сынама алып, керн кескіні сараптамаға жіберді. Жолдың сапасын тексеретін мамандар үш көшеден алынған сынама 8-10 см шамасында екенін, оның жобада көрсетілген ұзындықтан ауытқымағанын айтады. Жолдың сапасын қадағалап, зерделейтін Адалдық алаңы жобалық кеңсесі тексеру жұмыстарын маусымға сай, әр учаскеде жүргізіп отырады. Жол салып, оның сапасына салғырттық танытпай, тексерістен өткізіп жатқан жауаптыларға елдімекен тұрғындары алғыс білдірді. Инфрақұрылымы жоспарға сай жасалып жатқан тұрғын алаптың кейбір мәселесін де назардан тыс қалдырмады. Мегаполис аумағына кіретін жолдардың жалпы ұзындығы – 3247 шақырымды құрайды. Сәйкесінше, асфальт жолдың жақсы және қанағаттанарлық үлесі – 67,4 пайызды құрайды. Ағымдағы жылы 297 магистралды және ішкі орам көшелеріне орташа жөндеу жұмыстары жүргізіледі. Ал, бүгінгі алынған сынамалар арнайы сараптамаға жіберіліп, мердігер мекеменің жұмысына тиісті баға берілетін болады.
