«Боралдайдың бозторғайы» атанған айтулы ақын Орынбай Таймановтың кесенесі аянышты халде. Осыдан 23 жыл бұрын тұрғызылған бейіттің басындағы белгінің бүгінде күмбезі құлап, қабырғасы қаусаған. Жыр алыбы Жамбылдың үзеңгілес серігі, заманында аты алты Алашқа жайылған Орынбай ақын кесенесінің қирап жатқаны жайлы осыған дейін де айтылған мәселе. Десек те тозығы жеткен кесененің уәжінен қорытынды шықпаған.
Мына кесене түйдек сөздің төресі, өнерімен Алаш тұрмақ Мәскеуді тамсандырған Жамбыл Жабаевтың құрметіне орнатылған. Ал енді мұны Жамбыл ақынмен замандас, бала күнінен сөз шеберлігімен аты шыққан айтулы ақын Орынбай Таймановтың белгісімен салыстырып қараңы. Бәйдібек ауданына қарасты Ақжар ауылында, Боралдай өзенінің бойында орналасқан кесене 1992 жылы орнатылған деседі. Содан бері көптің көзінен таса қалған белгіні көрген адам жыларман күй кешері сөзсіз. Кесене маңында нысан мемлекет қарауында деген жазуды ұшыраттық. Дегенмен ақынды қастерлеуге келгенде мемлекет тұрмақ, өңірдің белгілі тұлғалары да салғырттық танытқаны байқалады.
Орынбай Тайманұлы Жамбыл Жабаевтан соң Ұлы Отан соғысы тақырыбында, жауынгер жанын жігерлендіретін, патриотизмге баулитын өлеңдерді көп жырлаған ақын. Оның нәубет жылдарда жазған «Отан үшін жан пида», «Жылы киім жинайық» деген секілді жігерлі жырларының Ұлы Жеңіске қол жеткізуде өзіндік үлесі болды. Ақын 1884 жылы дүниеге келген. Жасында кедейліктің зарын тартқан ол, Кеңес үкіметі орнаған тұста жаңа өмірді сипаттап өлеңдер шығарады. Дегенмен оның ақындық өнері жас күнінен белгілі болып, Бала ақын да атанған екен. Бүгінде Боралдай ауылдық округіндегі елдімекеннің бірі Орынбай Таймановтың есімімен аталады. Ал кесене келесі Ақжар ауылының биігінде орналасқан. Алайда тарихи орынға жетудің өзі де мұң. Яғни, Ақжар ауылындағы кесенеге жүргізілген арнайы жол жоқ. Тіпті екі ауылдың ортасын бөліп жатқан Боралдай өзенінен өтетін көпір де көңіл көншітерлік емес.
«Боралдайдың бозторғайы» жайында арнайы зерттеу жүргізген тарихшы Әсет Кембаев ол жайлы кітап та жазады. Ақын туралы аса жоғары пікірдегі азамат оның ескерусіз қалып бара жатқанынына қынжылатынын жеткізді. Асылын ардақ тұтатын қазақ халқы бұл дәстүрінен жаңылды дей алмаспыз. Дегенмен де Орынбайдай қазақ әдебиетінде елеулі үлесі бар ақиық ақынды ұмыт қалдыруы ағайынға сын. Тарихи кезеңдерді қамтыған 2015 жылда айтылған сөз иесін тауып, сын түзеліп жатса игі.
