Білімі бар, бірақ еңбек өтілі жоқ, жұмыссыз жастарға жаңа мүмкіндік. Үшінші мегаполисте іске қосылған жұмыспен қамту орталығы енді, бос жүрген жандарға барынша қолдау көрсетіп, жұмысқа орналастырмақ. Ол үшін нақты қандай шарттарды орындау қажет. Биыл аса басымдылық жастарға беріліп отыр. Осы орайда, Шымкентте жаңадан құрылған Тұран ауданы бойынша жұмыспен қамту бөлімшесі ашылды. Енді ауданның құрамындағы 21 елдімекен мен тұрғын алап тұрғындары жұмыспен қамту және атаулы әлеуметтік көмек бағыттары бойынша қызмет түрлерін Қазыбек би №50 мекен-жайынан ала-алады.
2023 жылы 950 мыңға жуық адамды жұмысқа орналастыру жоспарлануда, оның ішінде 231,3 мыңы – Ұлттық жобаларды іске асыру арқылы. Осы жыл аясында жыл басынан бері 700-ге жуық жұмыссыз жастар, жастар практикасы бағдарламасы арқылы жұмыспен қамтылған. Атаулы практиканың басты шарттары 35 жасқа дейінгі жастар өздері таңдаған мамандығы бойынша жұмыс таба алады. Бағдарламаға жоғарғы оқу орнын тәмамдағаны бойынша куәлік болуы шарт. Ол үшін жастар жұмыспен қамту орталығына өтініш қалдырып, жұмыссыз ретінде тіркелуі тиіс.
Тұран ауданы мегаполис аумағының 32%-ын құрайды. Жаңадан ашылған бөлімше күнделікті 100-200-ге жуық адамды қабылдай алады. Штаттық бірлік 25 адамнан құралған. Айта кетейік, Тұран ауданы бойынша жұмыспен қамту бөлімшесіне Қазыбек би көшесі бойынша № 84, 113, 114, 182 бағытындағы жолаушылар көлігі қатынайды.
