Іс-шаралар ұйымдастыру туризмдегі ең маңызды ынталандырушы фактор болып табылады, олар аумақтардың дамуына, оның маркетингтік жоспарларына және бәсекеге қабілеттілігіне әсер етеді. Зерттеуде шетелде және елімізде жекелеген аймақтарында ерекше шараларды ұйымдастыру арқылы сол ортаның туризмін дамыту тәжірибесін зерделеу негізінде оқиғалық туризмнің келешегі қарастырылады. Оқиғалық туризмді дамытудың табыстылығы іс-шараларды ұйымдастырудың, жоспарлаудың қалыптасқан жүйесіне және оқиға туризміне қатысушылардың өзара әрекеттесуінің тиімділігіне байланысты екендігі көрсетілген. Әртүрлі ұйымдар мен қызығушылық топтары арасында екі жақты байланыстар құру стратегиялық жоспарлау мақсаттарына жетуге мүмкіндік береді. Еліміздің үшінші қаласы статусына ие мегаполисімізде де тұңғыш рет ерекше фестиваль ұйымдастырылуда. Ерекшелігі сол әрбір тұрғын Шымкенттің көз тартарлық әсем көрінуіне атсалысады. Яғни, өз ауласын гүлмен безендіріп байқауға қатысады. Байқау келер жылдың көктемінде өз мәресіне жетеді.
Бұл туралы бүгін Шымкент қаласының туризм және сыртқы байланыстар басқармасының басшысы Ерлан Қыдыров баспасөз мәслихатында мәлімдеді.
«Менің гүлді аулам» – бұл көпқабатты үй тұрғындарының өз аулаларын гүлдермен безендіруге арналған конкурс. Яғни, конкурсқа қатысушы тұрғындар ауланы көгалдандырып, гүлзарлар мен сәндік ағаштар егіп, оларды үнемі тазалап, бұталар мен ағаштарға уақытылы күтім жасап отыруы тиіс», — деді Е.Қыдыров.
Конкурсқа өтінім беру 1 қазаннан бастап басталды.
Одан өзге басты шарттардың бірі – гүлдердің 25%-ы қызғалдақ болуы қажет. Жалпы, қатысушы аула тұрғындары дизайнын әрлеуде креативті тәсілдер қолданып, фестивальдің тақырыбын ашуы керек. Жеңімпаздар қомақты қаржымен марапатталады.
Атап айтқанда, 1 орын — 3 млн., 2 орын — 1 млн. және 3 орын — 500 мың теңге болады. Айта кетерлігі, жеңімпаздар әр ауданнан бөлек-бөлек таңдалады. Яғни, Қаратау, Еңбекші, Абай, Әл-Фараби және Тұран аудандарынан үш жеңімпаздан болады.
Айта кетерлігі, өткен жылдарда Шымкентте «Қызғалдақ жолы» атты гүлдер фестивалі өткен. Туризм және сыртқы байланыстар басқармасы бұл жолы фестивальге өзгерістер енгізіп, конкурс түрінде өткізуді жоспарлаған. Сондай-ақ, ауланы көгалдандыру, көркейту жұмысын да тұрғындардың өз қалауларына тапсырған. Күзде басталған жұмыстардың нәтижесі келер жылдың сәуір айында белгілі болады. Арнайы құрылған қазылар алқасы тиісті баға беру арқылы жеңімпаздарды анықтайды.
Өтінім беру – «visit-shymkent.kz» сайты арқылы жүреді.
КРИТЕРИЯЛАР:
- Ауланы көгалдандыру, гүлзарлар мен сәндік ағаштар егу және оларды үнемі тазалап, бұталар мен ағаштарға уақытылы күтім жасау, кесу (отырғызылған гүлдердің 25 %-ы қызғалдақ болуы қажет және қызғалдақ жанында көпжылдық гүлдер отырғызылу қажет);
- Тұрғындардың аула аумағында көгалдандыру, абаттандыру, тазалық пен тәртіп сақтау, сенбілік жасау, ауланы эстетикалық безендіру жұмыстарына белсене қатысуы;
- Құрғақ және зақым келген ағаштардың болмауы;
- Абаттандыру (аула аумағын сырлау, бояу, кіре-берістің (подъезд) жағдайына да мән беру және т.б);
- Фестивальдің жалпы тақырыбын ашу;
- Аумақта атқарылған жұмыстар бойынша презентация және әлеуметтік бейнеролик;
- Дизайнын әрлеуде креативті тәсілдер қолдану;
- Суару жүйесі мен гүлзарларға күтім жасаудың оңтайлы шешімін табу;
- Минералды тыңайтқыштарды қолдану;
- Жалпы сметалық шығыс.
