200-ГЕ ЖУЫҚ НЫСАНАЛЫ ГРАНТ БӨЛІНДІ

Шымкентте еңбек нарығының сұранысына байланысты 9-сынып түлектеріне 200 нысаналы грант бөлінді. Аталған жеңілдік бойынша, жас мамандар біліктілігін шаһардағы 12 кәсіпорында арттыра отырып, ары қарай тұрақты жұмысқа орналаса алады.

Нысаналы гранттың мемлекеттіктен айырмашылығы, болашақ жас мамандар ауызша әңгімелесу арқылы, яғни жалпы конкурс бойынша іріктеу процесін қажет етпей тиісті мамандық бойынша оқуға түсе алады.Мұнда, негізігі техникалық бағыттар бойынша білім беретін тиісті мемлекеттік мекеме, тек оқытып қана қоймай, жеңіл өнеркәсіп саласында ары қарай жұмысқа орналасуға мүмкіндік береді.

Бүгінгі таңда, аталған нысаналы грант бойынша 12 ірі кәсіпорын өтінім беріп, грант иегерлерін өз мекемелеріне тұрақты жұмысқа қабылдауға ниет білдіріп отыр. Ал бұл мекемелерге білім беру орнынан қойылатын негізгі талаптар: нарықта 3 жылдық тәжірибесі және дуальді оқыту бойынша өздерінің тиісті базасы болуы шарт.Нысаналы грант үш жақты келісім бойынша жүзеге аспақ. Осының негізінде жас маман оқу барысында тек қана білім алып қана қоймай, тұрақты жұмыспен де қамтылады деп жоспарланған.