СОҢҒЫ ҚОҢЫРАУ СЫҢҒЫРЫ

 Пандемиядан кейінгі оффлайн соғылған соңғы қоңырау. Бүгін Шымкенттің 242 500-ден аса шәкірті оқу жылын аяқтады. Ал, 11 189 түлек үшін  мектептегі қоңырау соңғы рет соғылды. Үздіктер қатарындағы №1 білім ұясы тарыдай балапандарын жазғы демалысқа жіберіп, таудай түлектерін ұядан ұшырды.

 Күміс қоңырау сыңғыры. Түлектерге сәт сапар тілеген алтын ұя! Бүгін еліміздің қай аймағында болмасын дәстүрлі мереке соңғы қоңырау салтанаты өтті. Екі жылдан кейін еркін, ешқандай шектеусіз соғылған қоңырау ата-ана, ұстаз бен балаға үлкен қуаныш сыйлады. Білім саласында үздік және үлгілі мектептердің бірі Пушкин атындағы №1  мектеп даңғыл жолға қадам басқалы тұрған түлектеріне ақ жол тілеп,  мерекелік шара өткізді.

Жиынға мектеп ұжымы, ата-анадан бөлек қалалық мәслихат депутаттары мен қоғамдық кеңес мүшелері қатысты. Мұғалімдерді оқу жылын жемісті жеңіспен аяқтағанымен құттықтап, үлкен өмірге қадам басқалы тұрған шәкірттерге сәт сапар тіледі.

Аталған мектепті ағымдағы жылы 186 түлек аяқтамақ. Олардың төртеуі «Алтын белгіден», 8-і «Үздік аттестаттан» үміт күтіп отыр.

Жүздеген шәкірттің жүрегіне жол тауып, тәрбие беріп, білім үйреткен мұғалімнің орны ерекше. Аяулы ұстаздардың еселі еңбегіне алғыс айтқан ата-аналар да ризашылықтарын білдірді.

Жыл сайын мыңдаған шәкірт мектепті аяқтап, жаңа өмірге қанат қағады. Ол — заңдылық та. Бастысы, Абай атамыз айтқандай, «Сен де бір кірпіш дүниеге, кетігін тап та, бар, қалан!» Ақ жол, саған, жас түлек!